Կիրակի լուսաբացին ոստիկանները և հատուկ նշանակության ուժերն ամբողջովին ցրել են Բաթումիի Չավչավաձե փողոցի ցուցարարներին, որոնք գիշերն ակնարգություններ են կազմակերպել: Այս մասին հայտնում է Sputnik գործակալությունը:
Հաղորդվում է, որ ցուցարարների ցրումն անցել է առանց լուրջ բախումների՝ երիտասարդների արմատական խմբերը, որոնք մի քանի ժամ աղմկել են փողոցում, սկսել են այն լքել հատուկ նշանակության ջոկատի գալուց անմիջապես հետո: Մնացած ցուցարարների նկատմամբ ռետինե փամփուշտներ են կիրառվել:
Անկարգությունների մասնակիցներ են ձերբակալվում:
Գործակալությունը հայտնում է, որ կոմունալ ծառայությունները սկսել են քաղաքը կարգի բերել: Իրադարձությունների կենտրոնում հայտնված Չավչավաձե փողոցում մայթեր են վնասվել, վաճառափեղկեր են կոտրվել, ցանկապատեր են քանդվել, լուսակիրները չեն աշխատում: Ամբողջ փողոցում այրված ավտոմեքենաների կմախքներ են երևում:
Անկարգությունների պատճառ է դարձել ոստիկանների վարքը, որոնք տեղի բնակչի են տուգանել: Ականատեսների խոսքով՝ իրավապահները վիրավորել են տղամարդուն, ինչի պատճառով նրան պաշտպանել են մոտակայքում եղած մարդիկ: Դա ծեծկռտուքի է հանգեցրել, ինչից հետո մի քանի մարդ է ձերբակալվել: Որոշ ժամանակ անց Աջարիայի Ներքին գործերի գլխավոր վարչության շենքի հարևանությամբ մոտ 1 000 մարդ է հավաքվել: Նրանք պահանջել են պաշտոնից ազատել պարեկային ոստիկանության նոր ղեկավար Մալխազ Բատիաշվիլիին:
Վրաստանի վարչապետ Գեորգի Կվիրիկաշվիլիի խոսքով՝ անկարգությունների հրահրման համար մեղավոր են «ապակառուցողական քաղաքական ուժերը»: