Ֆուտբոլի աշխարհի առաջնության ընտրական փուլի Հայաստան-Ղազախստան հանդիպման նախաշեմին մի խումբ երկրպագուներ «Առաջին լրատվական»-ի միջոցով նամակ էին հղել ՀՀ նախագահ Սերժ Սարգսյանին:
Ֆուտբոլասերները նախագահին խնդրել էին միջոցներ ձեռնարկել, որպեսզի մարդիկ հնարավորություն ունենան հետևելու Հայաստանի ազգային հավաքականի երևանյան հանդիպումները: Հազարավոր երկպագուներ այսօր տոմսերի թանկ լինելու պատճառով ուղղակի հնարավորություն չունեն մարզադաշտ այցելելու:
Խոսքը վերաբերում է հատկապես ուսանողներին, որոնց համար 5-10 հազար դրամ տոմսի համար վճարելը ընդունենք որ թանկ հաճույք է: Ազգային թիմի հանդիպումներին հետևելու հնարավորությունից զրկված են նաև հազարավոր երեխաներ, որոնք զբաղվում են ֆուտբոլով և ցանկանում են դառնալ ֆուտբոլիստ:
«Ֆուտբոլի ֆեդերացիան չի ցանկանում տոն պարգևել ֆուտբոլասերներին: Նրանք հավանաբար վախենում են մարդկանց հոծ բազմությունից: Հարևան երկրներում ազգային հավաքականի հանդիպումները տոնի են վերածվում, մարզադաշտերում անշլագ է լինում, որովհետև տոմսերը անհամեմատ ավելի էժան են, քան Հայաստանում: Սա ամոթալի և ցավալի իրողություն է Հայաստանի ցանկացած քաղաքացու համար: Պարոն նախագահ, ստեղծված ծանր իրավիճակը միայն Դուք կարող եք շտկել: Վերադարձրեք մեզ ֆուտբոլային տոները, որոնք այնքան էլ շատ չեն»,-մասնավորապես ասված էր հայտարարությունում:
Նշենք, որ բաց նամակը լայն արձագանք է գտել հասարակության շրջանում: Հատկապես սոցիալական կայքերում մարդիկ խնդրի վերաբերյալ տարաբնույթ առաջարկություններով են հանդես գալիս: Երկրպագուների մի մասը ուղղակի հիասթափված լինելով, Հայաստան-Ղազախստան հանդիպումը դիտելու այլընտրանքային նման մի տարբերակ է առաջրկում:
«10 հազար դրամի խորոված ու քյաբաբ կառնենք, ու տանը կնայենք»,-Ֆեյսբուք սոցիալական ցանցում գրել է երկպագուներից մեկը: Թերահավատ լինելով, որ ՀՀ նախագահ Սերժ Սարգսյանին ուղղված խնդրանքը կարող է «տեղ հասնել», ազգային թիմի բազմաթիվ երկրպագուներ էլ հորդորում են բոյկոտել Ղազախստան ընտրանու հետ հանդիպումը:
«Եթե հիշում եք Մոսկվայի Սպարտակի մարզիչ Մուրադ Յակինն իրեն չէր արդարացնում, սակայն ակումբի ղեկավարությանը չէր արձագանքում երկրպագուների դժգոհությանը: «Սպարտակի» խաղի ժամանակ ֆանատները առաջին րոպեից մեջքով շրջվեցին դեպի ֆուտբոլիստները մնացին մոտ քսան րոպե ու լքեցին մարզադաշտը: Արդյունքում, այսօր ունեն մի թիմ, որը Ռուսաստանի ընթացիկ առաջնությունում առաջին տեղում», ֆեյսբուքյան իր էջում գրել է օգտատեր Կամո Չոբանյանը ով կողմ լինելով հանդիպումը բոյկոտելուն բողոքի դրսևորման իր տարբերակն է առաջարկել: Ինչ-խոսք ստեղծված իրավիճակը բավական տհաճ է, ինչը շատերին ստիպում է դիմել կոշտ քայլերի: Տվյալ պարագայում բոյկոտի դրսևորումը, ցավոք սրտի, դժվար թե դրական ազդեցություն ունենա:
Արթուր Պետրոսյանի ազգային հավաքականի գլխավոր մարզիչ նշանակվելուց հետո հույս արթնացավ: Նրա գլախավորությամբ առաջին իսկ խաղում մեր ֆուտբոլիստները գերկամային հաղթանակ տարան 3:2 հաշվով՝ առավելության հասնելով Մոնտենեգրոյի նկատմամբ:
Մարզադաշտում բոյկոտի դրսևորումը առաջին հերթին հոգեբանական բացասական ազդեցություն կարող է ունենալ ֆուտբոլիստների վրա: Ակնհայտ է նաև, որ բոյկոտի հնարավոր դրսևորումը համընդհանուր բնույթ չի կրի: Վազգեն Սարգսյանի անվան «Հանրապետական» մարզադաշտ եկած երկրպագուների մի մասը այդուամենայնիվ զերծ կմնա ակցիային մասնակցելուց: Նման նախադեպերը բազմաթիվ են, երբ երկրպագուների մի մասը մարզադաշտում բողոքի ակցիա է իրականացրել իսկ մյուս մասը շարունակել հետևել հանդիպմանը:
Կարծում ենք, առկա խնդիրը պետք է լուծվի «Հանրապետական» մարզադաշտից դուրս: Պետք է հասկանալ, որ ֆուտբոլասերին մարզադաշտ տանելը, ֆուտբոլի զարգացման և մասայականացման գլխավոր ուղիներից մեկն է: Հայաստան-Ղազախտան հանդիպումը կայանալու է մարտի 26-ին: Խնդրի լուծման համար կա մոտ երկու շաբաթ ժամանակ: