ԴԱՀԿ նախկին պետ, Հանրապետական կուսակցությունից թիվ 1 ընտրատարածքում ռեյտինգային ընտրակարգով առաջադրված պատգամավորի թեկնածու Միհրան Պողոսյանի քարոզարշավին երեկ մասնակցում էր «Միասնություն» շարժման անդամ Խաչիկ Գալստյանը։
Ինչպես հայտնի է, այս շարժումը առաջիկա ԱԺ ընտրություններում սատարում է «Ծառուկյան» դաշինքին, և շարժման մի քանի անդամներ ռեյտինգային ընտրակարգով առաջադրել են իրենց թեկնածությունը։ Շարժման հիմնադիրներից Արման Վարդանյանն էլ, ամենայն հավանականությամբ, առաջիկա ավագանու ընտրություններում կգլխավորի «Ծառուկյան» դաշինքի ցուցակը։
Վարդանյանի մեկնաբանությամբ՝ Խաչիկ Գալստյանը Միհրան Պողոսյանի քարոզարշավին մասնագիտական աշխատանք է իրականացրել։
Ինքը՝ Գալստյանը, «Առաջին լրատվական»-ի հետ զրույցում ասաց, որ շարունակում է մնալ «Միասնություն» շարժման անդամ. «Այս պահին ռեյտինգային ցուցակում ընդգրկված չեմ և Միհրան Պողոսյանին մասնագիտական օգնություն եմ ցուցաբերում և իրականացնում եմ իմ մասնագիտական գործունեությունը որպես քաղաքական տեխնոլոգ, որպես քաղաքագետ»։
Դա չի՞ հակասում արդյոք «Միասնություն» շարժման գործունեությանը, չէ՞ որ շարժումն ընդդիմադիր կեցվածք ունի, իսկ Միհրան Պողոսյանը իշխող կուսակցության թեկնածու է՝ դիտարկմանն ի պատասխան Գալստյանն արձագանքեց. «Ոչ, «Միասնություն» շարժման մեջ տարաձայնություններ չկան, մենք մեկ մեծ նավակի մեջ ենք։ Ես «Միասնություն» շարժման հիմնադիրներից եմ, և մենք հանդես ենք գալիս մեր սերնդի շարժման, մեր սերնդափոխության անունից»։
Հետաքրքրվեցինք, թե կոնկրետ ի՞նչ աշխատանք է ենթադրում Միհրան Պողոսյանին մասնագիտական աջակցություն ցուցաբերելը. «Միհրան Պողոսյանը մասնակցում է Ազգային ժողովի ընտրություններին, կա քարոզչական հսկայական աշխատանք, որը ենթադրում է մասնագիտական ներգրավվածություն, և ես այդ հարցերում օգնում եմ իրեն։ Շատ լավ է, որ Հայաստանում կան մարդիկ, որոնք քաղաքական տեխնոլոգիաների մասնագետներին են դիմում։ Վստահ եմ, որ արդեն հաջորդ ընտրություններին բոլոր թեկնածուները կունենան մասնագիտական թիմեր իրենց քարոզարշավը քաղաքակիրթ ու բարձր մակարդակով անցկացնելու համար»։
Հարցին՝ աշխատանքը վճարովի է՞, Խաչիկ Գալստյանն արձագանքեց. «Դուք ոչ կոռեկտ հարց եք տալիս, ես ուղղակի օգնում եմ, իմ սերնդակիցն է, իմ հասակակիցն է, պարզապես օգնում եմ»։