Չեմպիոնների լիգայի խաղարկության 1/8-րդ եզրափակչում ՊՍԺ-ի նկատմամբ «Բարսելոնայի» տարած ֆանտաստիկ հաղթանակն ուղղակի ցնցեց ֆուտբոլային աշխարհը: Չեմպիոնների լիգայի պատմության ընթացքում սա գլխավոր սենսացիան էր: Այսօր քննարկման գլխավոր թեմաներից մեկը, եթե ոչ՝ գլխավորը, «Բարսելոնայի» ֆուտբոլիստների գործողություններն են, մրցավարի որոշումները և խաղային այլ դրվագներ: Ոմանք կարծում են, որ ֆանտաստիկ արդյունքը պայմանավորված խաղի հետևանք է, որին մասնակցել են բուքմեյքերական ընկերությունները: Ոմանք կարծում են, որ հանդիպման գլխավոր մրցավարը զգալիորեն օգնեց դաշտի տերերին:
Հայաստանը թերևս միակ երկիրն է, որտեղ «Բարսելոնայի» տպավորիչ խաղը քաղաքական երանգ է ստացել: Պատճառը, բնականաբար, ապրիլի 2-ին կայանալիք խորհրդարանական ընտրություններն են: Քաղաքական գործիչներից մեկը Ֆեյսբուք սոցիալական ցանցում գրել է, որ «Բարսելոնան» հաղթեց Հանրապետական կուսակցության ոճով և մեթոդներով:
Իսպանական Marca հեղինակավոր պարբերականի մասնագետների կարծիքով՝ հանդիպման գլխավոր մրցավարը երկու 11 մենտրանոց հարվածները, այսպես ասած, «օդից» է նշանակել ՊՍԺ-ի դարպասին: Ավելին, պարբերականի մասնագետների պնդմամբ՝ մրցավարը ՊՍԺ-ի օգտին չի նշանակել 100 տոկոսանոց 11 մետրանոցը, որը գործնականում կվճռեր դիմակայության ելքը:
Ցավոք սրտի, ՀՀԿ-ի կողմից մեր երկրում կեղծիքներն ու անօրինական գործողություններն այնքան շատ են, որ հասարակության շարքում լեգենդար ֆուտբոլային ակումբը նմանեցվում է Սերժ Սարգսյանի գլխավորած կուսակցությանը: «Բարսելոնային» կարելի է սիրել կամ չսիրել, բայց նման խաղը, որը շատերը հրաշք են որակում, հարգանքի է արժանի: Անկախ մրցավարի գործողություններից՝ «Բարսելոնան» հաղթեց: Իսպանական ակումբի ֆուտբոլիստները հաղթանակից հետո խոստովանել են, որ խաղադաշտ դուրս գալուց առաջ նույնիսկ չեն մտածել քառորդ եզրափակչի ուղեգրին տիրանալու մասին: Փաստորեն, կարելի է հաղթել՝ նաև չհավատալով հաղթանակին: «Բարսելոնան» ապացուցեց, որ ցանկացած ծանր իրավիճակից կա ելք, և կյանքում լինում են հրաշքներ:
Բնականաբար, մեր ազգաբնակչության ընդիմադիր հատվածը «Բարսելոնայի» հաղթանակը ասոցացնում է գալիք խորհրդարանական ընտրություններում հնարավոր հաղթանակի հետ: Նախագահական ընտրությունների կտրվածքով իշխանությունն այսօր հաղթում է 4:0 հաշվով: Մասնավորապես, 1998, 2003, 2008 և 2013 թվականներին հայտնի մեթոդներով իշխանական թեկնածուները՝ Ռոբերտ Քոչարյանն և Սերժ Սարգսյանը, կորզել են նախագահի աթոռը:
«Բարսելոնան» ՊՍԺ-ի հետ առաջին խաղում պարտվել էր 4:0 հաշվով: Կարելի՞ է արդյոք 4:0 հաշով պարտվելուց հետո ուղղակի ոչնչացնել մրցակցին: «Բարսելոնան» տվեց այս հարցի պատասխանը: Ի տարբերություն Ռոբերտ Քոչարյանի և Սերժ Սարգսյանի՝ փարիզյան ակումբը «Բարսելոնային» հաղթել էր արդար պայքարում, ուստի ճիշտ չի լինել պարտված թիմին համեմատել քաղաքական գործիչների հետ: Ցավոք, խորհրդարանական ընտրություններում չկա միասնական ընդդիմադիր ճակատ, որի ռևանշի հասնելը շատ ավելի իրատեսական կլիներ: Ընդդիմաիր ուժերն ու դաշինքները շատ են: Մնում է միայն հասկանալ ընդդիմադիր որ կուսակցությունը կարող է Հայաստանում «Բարսելոնայի» պես հրաշք գործել:
Հրաշքը՝ հրաշք, այդուհանդերձ՝ առաջին խաղում 4:0 հաշվով պարտվելուց հետո «Բարսելոնան» համապատասխան հետևություններ էր արել և երեք շաբաթ նախապատրաստվել ֆուտբոլային ճակատամարտին: Խելամիտ աշխատանքն ու նախապատրաստական աշխատանքները հաղթանակի հասնելու հիմնական գրավականներից են:
Մինչև խորհրդարանական ընտրությունները մնացել է մոտ երեք շաբաթ: Թեև հետևություններ անելու համար ընդդիմադիր կուսակցություններն ու դաշինքները ունեցել են երկար տարիներ, այդուհանդերձ՝ քաղաքական ճակատամարտին նախապատրաստվելու համար երեք շաբաթ ժամանակը, կարծում ենք, այնքան էլ քիչ չէ: