Ամերիկյան Յուտա նահանգի նախկին նահանգապետ Ջոն Հանթսմանը համաձայնել է դառնալ Ռուսաստանում ԱՄՆ դեսպան։ Այս մասին հայտնում է NBC հեռուստաալիքը։
ԱՄՆ վարչակազմում հեռուստաալիքի աղբյուրը հայտնում է, որ Հանթսմանն ընդունել է Վաշինգտոնի համապատասխան առաջարկը։ Անցած շաբաթ նախկին նահանգապետը հանդիպել է ԱՄՆ պետքարտուղար Ռեքս Թիլերսոնի հետ, նա նաև կապ է հաստատել նախագահ Թրամփի օգնականների, և հնարավոր է նաև՝ հենց նրա հետ։
Ավելի վաղ Politico պարբերականը՝ հղում անելով ԱՄՆ վարչակազմի աղբյուրին, հայտնել էր, որ շաբաթվա սկզբին ԱՄՆ նախագահ Դոնալդ Թրամփն առաջարկել էր Ջոն Հանթսմանին դառնալ Ռուսաստանում ԱՄՆ դեսպանը։
Պաշտոնը զբաղեցնելու պատրաստակամությունը հաստատող փաստաթղթերը Սպիտակ տուն ուղարկելուց հետո Վաշինգտոնը պաշտոնապես կհայտարարի նրա թեկնածության առաջադրման մասին, որից հետո նա պետք է անցնի Սենատում հաստատման գործընթաց։
Նա նախկինում զբաղեցրել է ԱՄՆ դեսպանի պաշտոնը Սինգապուրում և Չինաստանում։ 57-ամյա Հանթսմանը տիրապետում է չինարենին։
Հանթսմանն ավելի վաղ կողմ է արտահայտվել սպառազինությունների վերահսկման ոլորտում Վաշինգտոնի և Մոսկվայի միջև փոխգործակցությանը, սակայն պնդել, որ երկու պետությունների հարաբերությունները պետք է դիտարկել ավելի օբյեկտիվորեն։
ԱՄՆ նախագահական մրցարշավի ժամանակ Հանթսմանն աջակցել է Թրամփին՝ նրա հասցեին արված մի շարք քննադատական ելույթներից հետո։
