Մի խումբ ֆուտբոլասերներ «Առաջին լրատվական»-ի միջոցով բաց նամակ են հղել ՀՀ նախագահ Սերժ Սարգսյանին: Երկրպագուները ՀՀ նախագահից խնդրում են միջոցներ ձեռնարկել, որպեսզի մարդիկ հնարավորություն ունենան հետևելու Հայաստանի ազգային հավաքականի երևանյան հանդիպումները:
Մարտի 26-ին Հայաստանի ազգային հավաքականն Աշխարհի առաջնության ընտրական փուլի շրջանակներում Վազգեն Սարգսյանի անվան «Հանրապետական» մարզադաշտում մրցելու է Ղազախստանի հավաքականի հետ: Մարտի 3-ից վաճառքի են հանվել այդ հանդիպման տոմսերը, որոնք բավական թանկ են և արժեն 4-ից 10 հազար դրամ: Ֆուտբոլասերները իրենց վրդովմունքն են հայտնել այս առիթվ:
Նշենք որ Հարևան Ադրբեջանում ազգային հավաքականի մասնակցությամբ խաղերի տոմսերը՝ մոտ 8 անգամ, իսկ Վրաստանում մոտ 4 անգամ ավելի էժան են: Բաց նամակում մասնավորապես ասված է.
«Մեծարգո պարոն նախագահ: Լինելով ֆուտբոլի մեծ երկրպագու և սպորտին մոտ կանգնած գործիչ՝ վստահ ենք, որ ըմբռնումով կմոտենաք մեր պահանջին: Դուք մշտապես հաճախում եք Վազգեն Սարգսյանի անվան «Հանրապետական» մարզադաշտ և հետևում եք մեր ազգային հավաքականի հանդիպումներին: Ձեր ներկայությունը մարզադաշտում վստահություն և հաղթելու մեծ ձգտում է հաղորդում Հայաստանի ազգային հավաքականի ֆուտբոլիստներին: Մարտի 26-ին Հայաստանի ազգային հավաքականն աշխարհի առաջնության ընտրական փուլում հանդիպելու է Ղազախստանի ազգային հավաքականին: Կարծում ենք, որ Դուք այս անգամ ևս կայցելեք «Հանրապետական», կաջակցեք մեր ֆուտբոլիստներին, կհիանաք մեծ ֆուտբոլիստ Հենրիխ Մխիթարյանի խաղով:
Պարոն նախագահ, ցավոք սրտի, մենք և հազարավոր այլ երկրպագուներ մեր տղաներին աջակցելու և Հենրիխ Մխիթարյանի խաղով հիանալու հնարավորություն չունենք: Չունենք, քանզի Հայաստանի ֆուտբոլի ֆեդերացիան աննորմալ գներ է սահմանել տոմսերի համար: Հայաստանի հավաքականն այսօր աջակցության մեծ կարիք ունի, սակայն ֆուտբոլի չինովնիկների թեթև ձեռքով մեր թիմի երևանյան հանդիպումներն անցնում են կիսադատարկ տրիբունաների պայմաններում: Այնպիսի տպավորություն է՝ կարծես Հայաստանի հավաքականը Ֆուտբոլի ֆեդերացիայի սեփականությունն է: Հայաստանի հավաքականը Ձերն է, մերն է և բոլոր հայերինը:
Ֆուտբոլի ֆեդերացիան չի ցանկանում տոն պարգևել ֆուտբոլասերներին: Նրանք հավանաբար վախենում են մարդկանց հոծ բազմությունից: Հարևան երկրներում ազգային հավաքականի հանդիպումները տոնի են վերածվում, մարզադաշտերում անշլագ է լինում, որովհետև տոմսերը անհամեմատ ավելի էժան են, քան Հայաստանում: Սա ամոթալի և ցավալի իրողություն է Հայաստանի ցանկացած քաղաքացու համար:
Պարոն նախագահ, ստեղծված ծանր իրավիճակը միայն Դուք կարող եք շտկել: Վերադարձրեք մեզ ֆուտբոլային տոները, որոնք այնքան էլ շատ չեն: Աշխարհի առաջնության ընտրական փուլում Հայաստանի ազգային հավաքականը երեք միավորով ենթախմբում նախավերջին հորիզոնականում է գտնվում: Ղազախստանի հետ հանդիպումը վճռորոշ է լինելու մեզ համար: Միայն հաղթանակը թույլ կտա շարունակել պայքարը եզրափակիչ փուլի ուղեգրի համար: Իսկ հաղթանակի կայացման հարցում մեծ է 12-րդ խաղացողի, այսինքն՝ Ձեր և մեր դերակատարությունը: Օգնենք մեզ և մեր ազգային հավաքականին պատվով ներկայանալ Ղազախստանի հետ հավաքականի հետ հանդիպմանը:
Վստահ ենք, որ Ձեր և մեր ներկայությամբ մեր ֆուտբոլիստները կխաղան մեծ խանդավառությամբ, կցուցադրեն տպավորիչ ֆուտբոլ և գեղեցիկ հաղթանակով կուրախացնեն Ձեզ, մեզ և ողջ ազգաբնակչությանը»: