Ազգային վիճակագրական ծառայության տվյալներով՝ հունվարի 31-ի դրությամբ Սևանի մակարդակը բարձրացել է 23 սմ-ով: ՀՀ ԳԱԱ Հիդրոէկոլոգիայի և կենդանաբանության գիտական կենտրոնի տնօրեն Բարդուխ Գաբրիելյանը այս կապակցությամբ «Առաջին լրատվական»-ի հետ զրույցում ասաց, որ լճի մակարդակի բարձրացման կամ իջեցման մասին կարող ենք խոսել միայն դեկտեմբերի կամ հունվարի 1-ի տվյալները համեմատելով. «Այնպես որ՝ այդ 23 սմ-ը ճիշտ չէ, պետք է համեմատել հունվարի 1-ի դրությամբ»:
Տնօրենի խոսքով՝ այդ բարձրացումից վտանգ չկա. «Եթե նավթին, գազին կամ այլ էներգատարրերին կարող ենք ունենալ ալտերնատիվ, ապա խմելու ջրին ալտերնատիվ չկա: Այնպես որ՝ մոտ ապագայում հարուստ կլինի այն երկիրը, որը կունենա շատ քաղցրահամ ջուր: Բարեբախտաբար, երևի մեր պետությունն էլ է հիմա դա հասկացել»: Ուստի մեր զրուցակցի կարծիքով՝ եթե ընդունվեն Սևանի մակարդակի բարձրացմանը խոչընդոտող որոշումներ, ապա դա պետք է դիտարկել որպես հակահայկական:
Պարոն Գաբրիելյանը Սևանի սառցապատումը չի համարում արտառոց երևույթ. «Դա Սևանի էկոհամակարգին ինչ-որ վնաս չի բերի, ընդհակառակը՝ ձկնային պաշարները ինչ-որ չափով մնում են անվտանգ»:
Մեր զրուցակիցը համարում է, որ Սևանի ձկնապաշարները, հանձին սիգի, պետք է դիտել որպես ռազմավարական նշանակության պահուստային ֆոնդ:
Լուսանկարը՝ armeniasputnik.am-ի