Ադրբեջանցիներն իրական վայնասուն բարձրացրին, երբ խառը մենամարտերի Fight Nights Global 59 մրցաշարի շրջանակներում հայազգի Վարդան Ասատրյանը նոկաուտով հաղթելով ադրբեջանցի Էլնար Իբրահիմովին՝ գլխավերևում պահեց Արցախի Հանրապետության դրոշը: Ադրբեջանական կողմը պաշտոնական բողոք էր ներկայացրել տեղի ունեցածի վերաբերյալ, ինչի հետևանքով Fight Nights ընկերությունը խզեց պայմանագիրը Ասատրյանի հետ:
Ընկերության տարածած հաղորդագության համաձայն՝ մարզիկի հետ համագործակցության դադարեցման պաշտոնական պատճառ է դարձել էթիկայի նորմերի խախտումը, որն արտահայտվել է քաղաքական բովանդակության խորհրդանիշի գործածմամբ։ Ասատրյանը նման քայլը բացատրում է ծնունդով Արցախից լինելով և բազմիցս հայտարարել է, որ մենամարտերից հետո բավականություն է ստանում հաղթանակը իր հինավուրց հայրենիքին նվիրելուց:
Չցանկանալով մեկնաբանել Ասատրյանի քայլը՝ ընդունենք, որ անկախ ամեն ինչից՝ սպորտը քաղաքականացնելը գեղեցիկ չէ: Չնայած սպորտը չքաղաքականացնելու կոչերով օրեր առաջ հանդես էին գալիս ադրբեջանցիները, նրանց իսկ կողմից դրսևորվել է խայտառակ և ինչ-որ տեղ նույնիսկ ծիծաղելի ակցիա: Ադրբեջանի ֆուտբոլի առաջնության 20-րդ տուրում «Ինտերի» հետ մրցավեճում «Ղարաբաղ» թիմը փորձել է հարգանքի տուրք մատուցել ադրբեջանցի զոհված զինվորներին: Խաղից առաջ պաշտոնական արարողության ժամանակ ֆուտբոլիստները պարզել են Hər damla qanınızdır Azərbayca գրությամբ ցուցապաստառը, ինչը թարգմանաբար նշանակում է. Ադրբեջանը մեր արյան յուրաքանչյուր կաթիլն է: Ցուցապաստառի ներքևի հատվածում էլ գրված են եղել փետրվարի 24-ի լույս 25-ը գիշերը շփման գծում ադրբեջանական զինուժի կողմից իրականացված դիվերսիոն հարձակման ժամանակ հայկական կողմի պատասխան գործողությունների արդյունքում զոհված զինվորների անունները:
Անկախ ազգային պատկանելությունից՝ զինվորի կորուստը ցավ է: Ցավը կիսելու համար կան համապատասխան վայրեր և միջոցառումներ: Եթե «Ղարաբաղի» ֆուտբոլիստների արյան յուրաքանչյուր կաթիլը Ադրբեջանն է, ապա նրանք կարող էին ներկա գտնվել զինվորների hուղարկավորությանը կամ հոգեհանգստին:
Ի դեպ, նման ցուցապաստառի առկայությունը ոչ միանշանակ գնահատականի է արժանացել տեղական լրագրողների շարքերում: Նրանցից մեկը «Ղարաբաղի» գլխավոր մարզիչ Ղուրբան Ղուրբանովին այսպիսի հարց է ուղղել. «Ինչո՞ւ փետրվարի 26-ին միայն դուք այցելեցիք Շեհիդների ծառուղի»: Մոլորված մարզիչը պատասխանել է. «Մենք բոլորս ամեն տարի այցելում ենք շեհիդների շիրիմներին: Չեմ ուզում ծավալվել այս թեմայի շուրջ: Չեմ ուզում ասել՝ ինչպես ենք օգնում զոհվածների ընտանիքներին: Ասեմ միայն, որ ակումբի նախագահ Թահիր Գեզալը հանդիպել է ֆուտբոլիստներին և անգլերենով բացատրել, թե ինչ է կատարվում հայ-ադրբեջանական սահմանին»:
«Ինտերի» հետ հանդիպմանը «Ղարաբաղի» հիմնական կազմում խաղադաշտ են դուրս եկել 5 օտարերկրացի ֆուտբոլիստներ՝ բոսնիացի, իսպանացի, բրազիլացի, մակեդոնացի և ալբանացի: Ինչ է ստացվում՝ Ադրբեջանը նշված ազգության ֆուտբոլիստների արյան կաթի՞լն է: Ուղղակի ծիծաղելի է: ՖԻՖԱ-ի կանոնադրության մեջ հստակ գրված է, որ ֆուտբոլը չի կարելի քաղաքականացնել:
«Ղարաբաղը» ոչ միայն անթույլատրելի ակցիա է իրականացրել, այլև թիմի օտարերկրացի խաղացողներին օգտագործել է Ադրբեջանի արտաքին քաղաքական խնդիրներին առնչվող գործողություններում: Եթե Վարդան Ասատրյանը Արցախի դրոշը ծածանելու համար որակազրկվեց, ապա ինչո՞ւ «Ղարաբաղը» պետք է զերծ մնա պատժամիջոցներից: Հիշենք տարիներ առաջ Երևանում կայացած Հայաստան-Թուրքիա հանդիպումը: Նման դեպքերում ՖԻՖԱ-ի կողմից բավական խիստ է դրված մարզադաշտում քաղաքական պաստառների և նմանատիպ այլ դրսևորումների հարցը: Ու թեև մեր մարզասերների մոտ կար ցանկություն ընդդեմ Թուրքիայի պահանջատիրական գործողությունների ակցիա իրականացնել, այդուհանդերձ՝ «Հրազդան» մարզադաշտ եկած մոտ 50 հազար երկրպագուները զերծ մնացին դա անելուց:
«Ղարաբաղ» ֆուտբոլային թիմը, որը հաջող ելույթներից հետո ճանաչում էր ձեռք բերել Եվրոպայում, նման քայլով ուղղակի խայտառակեց իրեն: Անթույլատրելի գործողությունը տեղի է ունեցել ոչ թե մարզասերների, այլ ֆուտբոլիստների կողմից: Տեղի ունեցածի վերաբերյալ թե ինչ արձագանք կտա ՖԻՖԱ-ն՝ ցույց կտա ժամանակը: