Վերջին օրերի լարվածությունը, որ նկատվում է արցախա-ադրբեջանական շփման գծում, շատ մտահոգիչ ու վատ նախանշան է այն բանի, որ գարնանը լայնածավալ ռազմական գործողությունները կարող են վերսկսվել հակամարտության գոտում՝ կարծում է Կարնեգի Եվրոպա հիմնադրամի ավագ հետազոտող, Հարավային Կովկասի հարցերի փորձագետ Թոմաս դե Վաալը:
Փորձագետը «Առաջին լրատվական»-ի խնդրանքով մեկնաբանեց նաև մեր հարցը՝ եթե գարնանը իսկապես հակամարտության սրացման վտանգ կա, այդ դեպքում ինչպե՞ս կգործեն կամ ինչպե՞ս կարձագանքեն միջնորդները՝ ԵԱՀԿ Մինսկի խմբում համանախագահող պետությունները, հատկապես Ռուսաստանը և Միացյալ Նահանգները: Մոսկվան ու Վաշինգտոնը չե՞ն փորձի կանխել Ադրբեջանի հերթական հարձակումը, թե՞ նրանք չունեն ադրբեջանական կողմին զսպելու գործնական լծակներ:
«Ի պատասխան ձեր հարցի՝ պիտի ասեմ, որ Ռուսաստանը ակնհայտորեն ամենաազդեցիկ խաղացողն է, բայց նաև հետկուլիսային դիվանագիտություն է ընթանում ՄԱԿ-ում, ԵԱՀԿ-ում և այլ խողովակների միջոցով, որոնք զգուշացնում են կողմերին, թե ինչ վտանգ է պարունակում նոր հակամարտությունը, որը կարող է բռնկվել գարնանը կամ ավելի վաղ: Այդուհանդերձ, եթե կողմերից մեկը կամ երկուսը ցանկանում են կռվել, շատ քիչ բան կա, որ կարող է նրանց կանգնեցնել»,- նշեց Թոմաս դե Վաալը: