Ադրբեջանի կողմից վերջին շրջանում ձեռնարկվող քայլերը՝ բլոգեր Ալեքսեյ Լապշինի նկատմամբ քրեական գործ հարուցելու, Բաքու արտահանձման պահանջ դնելու, Արցախ այցելած ԵԽ պատգամավորների նկատմամբ քրեական հետապնդում հայտարարելու հուշում են մեկ բան մասին՝ Ադրբեջանը հակադրվում է քաղաքակրթության բոլոր հնարավոր չափանիշներին, դառնում է անկանխատեսելի և վտանգավոր: Այս մասին, այսօր՝ փետրվարի 27-ին, ԱԺ-ում հայտարարել է ՀՀԿ խմբակցության պատգամավոր Սամվել Ֆարմանյանը:
Նրա խոսքով՝ դրա ամենաթարմ ապացույցը Ադրբեջանի կողմից դիվերսիոն հարձակման վերջին փորձն էր, որը Հայաստանի Զինված ուժերի կողմից կանխվեց ոսկերչական ճշգրտությամբ:
Ս. Ֆարմանյանը նշեց, որ միջազգային հանրության արձագանքը համարժեք չէ ստեղծված իրավիճակին. «ԵԱՀԿ Մինսկի խմբի հայտարարությունը ոչ համարժեք էր ստեղծված իրավիճակին, այն պարագայում, երբ հայկական ԶՈՒ-ն ներկայացրել է բոլոր հնարավոր փաստարկները, որոնք վկայում են, թե կողմերից որն է խախտել հրադադարի ռեժիմը, ով է ձեռնարկել ռազմական էսկալացիայի փորձ»:
Նրա խոսքով՝ նման անհամարժեք, կողմերի միջև հավասարություն դնող հայտարարությունները որևէ օգուտ չեն տալիս, բացի նրանից, որ ծխածածկույթ են հանդիսանում Ադրբեջանի համար՝ իրականացնելու նման քայլեր:
Հիշեցնենք՝ ԵԱՀԿ Մինսկի խմբի համանախագահներն իրենց հայտարարությունում հիշեցնում են կողմերին ուժի կիրառումից զերծ մնալու իրենց հանձնառությունների մասին։ «Համանախագահները կոչ են անում կողմերին ավելի վաղ շփման գծին մոտեցված ծանր ռազմական տեխնիկան պահել ներկա դիրքերում և թույլ տալ վերցնել մահացածների մարմինները, ինչպես երեկ համաձայնեցվել է ԵԱՀԿ գործող նախագահի անձնական ներկայացուցչի միջնորդությամբ»,- ասված էր համանախագահների հայտարարությունում:
