ՀՀ նոր սահմանադրության ընդունումից հետո մշակվել է «Մարդու իրավունքների պաշտպանի մասին» ՀՀ սահմանադրական նոր օրենք: Այն 2016 թ. դեկտեմբերին ընդունվել է Ազգային ժողովի կողմից և ամբողջությամբ ուժի մեջ կմտնի ընթացիկ տարվա մարտին: Այս մասին այսօր կայացած մամուլի ասուլիսին հայտարարեց ՀՀ մարդու իրավունքների պաշտպան Արման Թաթոյանը:
«Նախագիծը մշակելիս խնդիր էինք դրել հնարավորինս մեծացնել ՄԻՊ-ի ենթակառուցվածքային ազդեցության մակարդակը: Մարդու իրավունքների պաշտպանի մասին նոր սահմանադրական օրենքով մի քանի կարևոր սկզբունքներ են դրված: Առաջին հերթին ավելի ուժեղացվել է աշխատանքի հրապարակայնությունը և թափանցիկությունը: Իհարկե, այստեղ բավականին մեծ շեշտադրումներ են դրվել քաղաքացիական հասարակության հետ աշխատանքի սկզբունքների վրա»,- ասաց Ա. Թաթոյանը:
Նրա հավաստմամբ՝ նոր օրենքով կարևոր հիմնարար փոփոխության է ենթարկվել խոշտանգումների և վատ վերաբերմունքի կանխարգելման մեխանիզմը: Ըստ ՄԻՊ-ի՝ այժմ ավելի են ուժեղացվել այն իրավական գործիքները, որոնք վերապահված են: Բացի այդ, այսուհետ Մարդու իրավունքների պաշտպանի տրամադրության տակ կլինեն խցերի խոնավությունը, տարածքը, լուսավորությունը և ջերմաստիճանը չափող տեխնիկական միջոցները:
ՄԻՊ-ի խոսքով՝ կարևոր հիմնարար փոփոխություն է նաև այն, որ ՀԿ-ները և անկախ փորձագետները ներգրավվելու են ՄԻՊ-ի աշխատանքներին. «Խոշտանգումների կանխարգելման մեխանիզմի աշխատանքներում ներգրավելու են հասարակական կազմակերպությունների ներկայացուցիչներ: Այսինքն, մեզ հետ միասին շատ ավելի ուժեղացված ձևերով այցեր են իրականացվելու»:
Մանրամասները՝ տեսանյութում:
