«Հարավկովկասյան երկաթուղիներ» ընկերությունում առկա խնդիրների շուրջ «Առաջին լրատվական»- ի հետ զրույցում ՀՀ տրանսպորտի, կապի և ՏՏ նախարարության երկաթուղու վարչության նախկին պետ Արսեն Մկրտչյանը անդրադարձավ դիտարկմանը, որ «Հարավկովկասյան երկաթուղիներ» ընկերությունը, որ պետք է հանդիսանար բեռնափոխադրումներ և ուղևորափոխադրումներ իրականացնող կարևոր օղակներից մեկը՝ կրճատելով մեր կախվածությունը Լարսից, փաստացի չի ծառայում իր նպատակին:
«Սկզբնական ժամանակահատվածում՝ 2008թ. հունիսի 1-ից, երբ որ մեկնարկեց կոնցեսիոն կառավարման պայմանագիրը, բեռների հիմնական մասը՝ ցորենը և նավթը, բերվում էին երկաթուղով և ծավալները բավականին գոհացուցիչ էին, և բեռնափոխադրումների այլընտրանքային այդ ճանապարհն աշխատում էր և այսօր էլ աշխատում է, սակայն այն լիարժեք այլընտրանք չդարձավ գործող Լարսի ճանապարհին, որովհետև ի սկզբանե «Հարվկովկասյան երկաթուղու» սակագնային քաղաքականությամբ մրցակցային գին չէր առաջարկվում, և բեռնափոխադրողների մի ստվար զանգված տեղափոխվեց դեպի ավտոմոբիլային ճանապարհ»,- նշեց Ա. Մկրտչյանը:
Արսեն Մկրտչյանի խոսքով՝ 174 միլիարդ դրամի պարտավորություն կար, որ ընկերությունը պետք է ներդներ, որից 110 միլիարդն արդեն փաստացի ներդրված է համարվում, բայց դրա արդյունավետությունը չկա, ընկերությունը բացարձակապես դրական շարժ չի գրանցել իր գործունեության մեջ: «Ամենավրդովեցնող խնդիրն այն է, որ ներդրումներն արդյունավետ չեն եղել, ներդրման արդյունքում չեն էժանացել փոխադրման ծախսերը, չեն էժանացել ուղևորափոխադրումները, չեն կրճատվել բեռների տեղ հասցնելու ժամկետները»:
Մանրամասները՝ տեսանյութում:
Լուսանկարը՝ armeniasputnik.am-ի
