«Իմ տպավորությամբ՝ ընդդիմություն չկա բոլոր այն 9 ուժերի մեջ, որոնք մասնակցելու են ընտրություններին, ես կարծում եմ, որ միակ ճշմարիտ ընդդիմությունը «Սասնա ծռեր»- ն են, որովհետև նրանց քայլը, նրանց գործողությունը ես համարում եմ քաղաքական քայլ: Նրանք ներկայացրել էին քաղաքական պահանջներ, հիմա էլ ունեն իրենց ուղեծիրը, իրենց ճանապարհային քարտեզը և պահանջները: «Սասնա ծռեր»-ը լիարժեք քաղաքական ուժ է, նրանք իրավունք ունեն և կարող էին մասնակցել ընտրություններին, կալանավորված են, բայց նրանց մեղքը հաստատված չէ, վճիռ դեռ չի կայացվել, այլ հարց է, որ նրանք գտնում են, որ ներկա իրավիճակում ընտրություններով որևէ արմատական փոփոխություն իրականացնել հնարավոր չէ»,- «Առաջին լրատվական»- ի հետ զրույցում ասաց դերասանուհի, ռեժիսոր Թամար Հարությունյանը:
Անդրադառնալով դիտարկմանը, որ «Սասնա ծռեր»- ի համակիրները քաղաքական գործընթացների մեջ են մտել և ընտրությունների միջոցով փորձում են հասնել փոփոխությունների, Թ. Հովհաննիսյանը նշեց, որ Արմեն Մարտիրոսայնը և Հովսեփ Խուրշուդյանը, ովքեր ձերբակալվել էին հուլիսյան իրադարձությունների ժամանակ, կուսակցականներ են և մասնակցում են՝ կուսակցության կողմից ներկայացված լինելով: ««Նոր Հայաստան»- ը կազմված էր «Հիմնադիր Խորհրդարան»-ի, «Ոտքի՛, Հայաստան»-ի և «Ժառանգության» անդամներից: Հիմա «Ժառագության» անդամները և «Ոտքի՛ Հայաստան»-ը՝ ի դեմս Ա. Ղուկասյանի՝ որոշել են մասնակցել ընտրություններին: Իսկ կալանավորված «Սասնա ծռեր»- ը դեմ են ընտրություններին մասնակցելուն»:
Թամար Հովհաննիսյանը նշեց, որ կողմ է բոյկոտին: Նրա կարծիքով՝ ընտրություններին մասնակցելն անիմաստ է. «Ընտրություններն արդեն կեղծված ենք, քանի որ կեղծ հանրաքվեով ընդունվեց Սահմանադրությունը, որը շատ հարմարեցված է, և Ընտրական օրենսգիրքը ևս հարմարեցված է»: Դերասանուհին կանխատեսում է, որ ֆորսմաժորային դեպքեր կարող են լինել և ընտրությունները հնարավոր է չկայանան: Ծեծկռտուք ՀՀԿ-ականների միջև, «կաշի քերթելու և աչքեր հանելու» սպառնալիքներ. այսպես չեն արվում նախընտրական գործողություները. սա համարում եմ ոչ ադեկվատ: Կամ ՀՀԿ-ականներից ոմանք ծնկաչոք աղաչում են Սերժ Սարգսյանին ընտրացուցակում 3-րդ տասնյակից 2-րդ տասնյակ փոխադրել… Սա նորմալ քաղաքական մտածելակերպ չէ»:
Թամար Հովհաննսիյանն անդրադարձավ նաև «Սասնա ծռեր»-ի աջակից «հաց բերող» Արթուր Սարգսյանի վիճակին, ահազանգելով, որ առողջական լուրջ խնդիրներ ունի, ծանր վիճակում է. «Անշարժ պառկած է, կերակրափողի հետ կապված խնդիր ունի: Պիտի աղաղակեմ այդ մասին: Անթույլատրելի է նրա մոտ բժիշկներ չուղարկելը, այդ մասին հանրությանը տեղյակ չպահելը: Այսպե՞ս վերաբերվել մարդ արարածին: Փաստաբաններն աշխատանք են իրականացնում, որ նրան կարողանան տեղափոխել քաղաքացիական հիվանդանոց, բայց այդ բարի և քաջ մարդը հրաժարվում է: Չի ուզում համաձայնել, որովհետև նա այսպես բողոքում է այս ճչացող անարդարության դեմ»:
Մանրամասները՝ տեսանյութում: