Ֆրանսիայի վարչապետ Բեռնար Կազնյովն արշավ է սկսում նախագահի թեկնածու, «Ազգային ճակատ» աջ ծայրահեղական կուսակցության առաջնորդ Մարին Լե Պենի դեմ՝ գրում է Journal du Dimanche թերթը։
«Իմ պատասխանատվությունն է անել ամեն բան՝ ցույց տալու ֆրանսիացիներին, որ «Ազգային ճակատի» առաջարկները ստով քողարկված փակուղիներ են»,-թերթին ասել է Կազնյովը։ Նրա խոսքով՝ ահաբեկչության դեմ պայքարի հարցում «Ազգային ճակատը» հանդես է եկել բոլոր միջոցառումների դեմ, որոնք ձեռնարկվել էին երկրի պաշտպանության համար, ներառյալ հակաահաբեկչական օրենքները, ավիաուղևորների եվրոպական ռեգիստրի ստեղծումը։
Թերթի տվյալներով՝ առաջիկայում վարչապետը ծրագրել է մի շարք ուղևորություններ այն շրջաններ, որտեղ նկատվում է «Ազգային ճակատի» ուժեղ ազդեցությունը։
Ինչպես հաստատում է Կազնյովը՝ քվեարկությունը «Ազգային ճակատի» օգտին կարող է հանգեցնել անուղղելի հետևանքների, աղետալի՝ առաջին հերթին առավել խոցելի քաղաքացիների համար։ «Դա նշանակում է հրաժարվել նրանից, ինչ անում է Ֆրանսիան, համերաշխությունից, արժեքներից, որոնք ընկած են մեր հանրապետական պակտի հիմքում»,-ասել է նա։
Ֆրանսիայի նախագահի ընտրությունները կկայանան երկու փուլով՝ ապրիլի 23-ին և մայիսի 7-ին։