Իրանի նախկին նախագահ Մահմուդ Ահմադինեժադը նամակ է գրել ԱՄՆ նախագահ Դոնալդ Թրամփին։ Նամակում Ահմադինեժադն անդրադարձել է տարբեր քաղաքական և տնտեսական թեմաների, բարոյական և էթիկական ասպեկտների, այդ թվում կանանց նկատմամբ տարբեր պատմական ֆիգուրների ու ժամանակակից քաղաքական գործիչների վերաբերմունքին։
Associated Press-ի փոխանցմամբ՝ Իրանի նախկին նախագահը քննադատել է միգրացիոն նորմերի խստացումը, ինչպես նաև ՄԱԿ-ում ԱՄՆ-ի «գերակայությունը»։
Ահմադինեժադն ընդգծել է, որ ԱՄՆ-ը պատկանում է բոլոր ժողովուրդներին՝ նշելով ազգերի բազմազանության հանդեպ հարգանքի անհրաժեշտությունը։
Իրանի նախկին առաջնորդը նամակը փոխանցել է Թեհրանում Շվեյցարիայի դեսպանատուն, որը ներկայացնում է Վաշինգտոնի շահերը։
Նախկինում Ահմադինեժադն արդեն բազմիցս նման ուղերձներ հղել է համաշխարհային առաջնորդներին։
Նախկին նախագահի ակտիվ նամակագրությունը բացասական արձագանք է առաջացնում Իրանում։ Երկրում կարծում են, որ այդ նամակները ոչ միայն օգոււտ չեն բերում երկրին, այլև կարող են վնաս հասցնել ազգային շահերին։
Ահմադինեժադը ծրագրել էր իր թեկնածությունը դնել մայիսին կայանալիք հերթական նախագահական ընտրություններին, սակայն Իսլամական հանրապետության հոգևոր առաջնորդ այաթոլլա Ալի Խամենեին դա համարել է «անխոհեմ և ոչ նպատակահարմար»։