Թուրքիայի արտգործնախարար Մևլյութ Չավուշօղլուն հայտնել է ԴԱԻՇ-ից սիրիական Ռաքքա քաղաքի և ողջ Սիրիայի տարածքի ազատագրման գործողությանն Անկարայի մասնակցության պատրաստակամության մասին։
Թուրքիայի գլխավոր շտաբը հինգշաբթի հայտնել էր «Եփրատի վահան» գործողության շրջանակում ԴԱԻՇ-ի ահաբեկիչներից սիրիական Էլ-Բաբի բոլոր թաղամասերի մաքրման ավարտի մասին, որն անցկացնում էին թուրքական բանակն ու զինված սիրիական ընդդիմության ներկայացուցիչները։
Չավուշօղլուի խոսքով՝ Թուրքիան Սիրիայում հետագա քայլերի թեման քննարկել է ԱՄՆ-ի գլխավորած միջազգային կոալիցիայի մասնակիցների հետ։ «Ռաքքայի թեման քննարկվել է Ֆրանսիայի, Մեծ Բրիտանիայի և Գերմանիայի ներկայացուցիչների հետ։ Ճիշտ պլանավորմամբ և տեղի ուժերի ներգրավմամբ մենք կարող ենք հեշտությամբ մաքրել Սիրիայի տարածքը ԴԱԻՇ-ի ահաբեկիչներից»,-թուրք նախարարի խոսքերն է մեջբերում Anadolu գործակալությունը։
Չնայած սիրիական Էլ-Բաբն անցել է թուրք զինվորականների լիարժեք վերահսկողության տակ, այնտեղ ականազերծումն ավարտված չէ։
Անդրադառնալով «Եփրատի վահան» գործողության հետագա զարգացմանը՝ Չավուշօղլուն նշել է, որ անհրաժեշտ է ազատագրել նաև Մանբիջ քաղաքը, որտեղ գործում են սիրիացի քրդերի ինքնապաշտպանական ուժերը (YPG), որոնց Անկարան ահաբեկչական կազմակերպություն է որակում։ «Մենք ակնկալում ենք ԱՄՆ-ից քայլեր՝ Մանբիջի YPG-ի ջոկատների առնչությամբ։ Այնուհետև մենք ծրագրում ենք գործողություն Ռաքքայում»,-ասել է Չավուշօղլուն։
Նա նշել է, որ Անկարան պատրաստ է նոր էջ բացել ԱՄՆ-ի հետ հարաբերություններում։ «Դրա համար պետք են հստակ քայլեր։ Պետք է լցնել թուրք-ամերիկյան հարաբերությունները նոր իմաստով։ Դրա համար կա ամեն անհրաժեշտ բան, այդ թվում և ԱՄՆ նոր վարչակազմը, որը ճանաչում է անցյալի սխալները»,-հավելել է Չավուշօղլուն։
