ՀՀ պաշտպանության նախարար Վիգեն Սարգսյանը խոսել է ՀՀ զինված ուժերի կողմից «Իսկանդեր» հրթիռային համակարգերի հնարավոր կիրառման մասին այն պատճառով, որ Բաքվում «տաք գլուխների» քանակը չի քչացել:
«Ռեգնում» լրատվական գործակալության գլխավոր խմբագիր, քաղաքական վերլուծաբան Մոդեստ Կոլերովը «Առաջին լրատվական»-ի հետ զրույցում նշեց` կան տեղեկություններ այն մասին, որ ապրիլին ադրբեջանական կողմը կարող է նոր հարձակում սկսել Լեռնային Ղարաբաղի դեմ, հետևաբար ՀՀ պաշտպանության նախարարի այս հայտարարության նպատակն է կանխել հնարավոր նոր պատերազմը:
– Պարոն Կոլերով, ի՞նչ նպատակով է արվել այս հայտարարությունը, զուտ Ադրբեջանի ագրեսիվ պահվածքը զսպելու, թե՞ կան նաև այլ պատճառներ:
– «Իսկանդերը» անկասկած զսպման շատ հզոր զենք է, քանի որ միայն «Իսկանդերի» կիրառումը բավարար չէ, օրինակ, ճակատային գիծը առաջ տանելու կամ տեղաշարժելու համար: Դրա համար պետք են մեծ թվով ուժեր: Իսկ «Իսկանդերը» կարող է ագրեսորին հասցնել անդառնալի վնաս, որը քաղաքական ցանկացած օգուտ տնտեսապես կդարձնի չափազանց թանկ:
Երկրորդը, քաղաքական ի՞նչ հեռանկարի մասին կարելի է խոսել այն դեպքում, եթե պատերազմը դառնում է անհնար: Քաղաքական այդ հեռանկարը Լեռնային Ղարաբաղի ճանաչումն է: Սա է գլխավորը:
Երրորդը, մենք հասկանում ենք, թե ինչու այդ հայտարարությունը արվեց հիմա. քանի որ «տաք գլուխների» քանակը Բաքվում չի քչացել, և գալիս են տեղեկություններ այն մասին, որ ապրիլին Բաքուն կուզենա կրկնել Ապրիլյան պատերազմը: Այս հայտարարության նպատակն է կանխել հնարավոր նոր պատերազմը:
– Այսինքն՝ դա այդքան ակնհայտ հեռանկար է:
– Այո, եթե ինչ-որ մեկը ապրիլին նոր հարձակողական պատերազմ սկսի Ղարաբաղի դեմ, ապա նա ռիսկի է դիմում դառնալ «Իսկանդերի» թիրախ:
– Վիգեն Սարգսյանի այս հարցազրույցը ժամանակային առումով գրեթե համընկավ ՀՀ արտգործնախարար Էդվարդ Նալբանդյանի մոսկովյան այցի և Լավրովի հետ բանակցությունների հետ: Հայտարարությունը կարո՞ղ է կապված լինել այս գործընթացի հետ և կարո՞ղ է արդյոք ինչ-որ կերպ համաձայնեցված լինել ռուսական կողմի հետ:
– Ես գիտեմ, որ Երևանի այն հայտարարությունները, որոնք առնչվում են Հայաստանի ինքնիշխան հարցերի հետ՝ պաշտպանություն, քաղաքականություն և այլն, երբեք չեն համաձայնեցվում Մոսկվայի հետ: Միակ բանը, որ կարող ենք ասել ինչ-որ ընդհանուր մոտեցումների մասին, վերաբերում է Ղարաբաղյան հակամարտության կարգավորմանը: Պաշտպանության նախարարը չի զբաղվում ղարաբաղյան կարգավորմամբ, այլ միայն անուղղակիորեն, կողքից քննարկում են այդ հեռանկարը, ուստի կարծում եմ, որ նշված հայտարարությունը չի համաձայնեցվել Մոսկվայի հետ, բայց քանի որ հենց Մոսկվան է մատակարարել «Իսկանդերները» Հայաստանին և հենց Մոսկվան է այդպիսով իր վրա քաղաքական պատասխանատվություն վերցրել այն հավասարակշռության համար, որը ստեղծում է «Իսկանդերի» առկայությունը Հայաստանում, և Անդրկովկասում Մոսկվայի քաղաքականության առաջադրանքը հավասարակշռությունն է, ապա կարծում եմ, որ պաշտպանության նախարարի այդ հայտարարությունը հանդիսանում է նաև յուրօրինակ հարց Մոսկվային՝ ինչպե՞ս է Մոսկվան վերաբերվում այն հանգամանքին, որ «Իսկանդերը» օգտագործվի՝ որպես պաշտպանական զենք ագրեսիայի հնարավոր վերսկսման դեպքում:
– Իսկ ինչպե՞ս եք գնահատում Ադրբեջանի ներկայիս քայլերը, օրինակ այն, որ Ադրբեջանը հետախուզում է հայտարարել Եվրախորհրդարանի՝ Արցախ այցելած երեք պատգամավորների նկատմամբ:
– Բաքուն հետևողականորեն գնում է հակամարտության սրման ճանապարհով: Այստեղ որևէ նոր բան չկա: Ինչպես բոլորս տեսանք՝ չարդարացան Լուկաշենկոյի հույսերը, որ Բաքուն ինչ-որ ձևով կվճարի Լապշինին հանձնելու համար, և այդպիսով Ադրբեջանը կորցրեց ևս մի կողմնակից: Եթե Ադրբեջանը գնում է հակամարտության և դինաստիական իշխանությունը փրկելու ուղիով, ապա պարզ է, որ այդպիսի քաղաքականությունը շատ երկրպագուներ չի ունենա:
Բացի այդ, ուզում եմ ձեր ուշադրությունը հրավիրել այն հանգամանքի վրա, որ Ադրբեջանում արդարացիորեն անհանգստանում են Միացյալ Նահանգների և Իրանի միջև հնարավոր նոր հակամարտության կապակցությամբ: Միացյալ Նահանգները Իրանի հարցում կրկին բարձրացրել են «հարավային Ադրբեջանի» հարցը, և տարածաշրջանում բոլորն էլ հասկանում են, որ «հարավային Ադրբեջանի» թեման Իրանի դեմ իրականում սարսափելի, աղետալի վտանգ է հյուսիային Ադրբեջանի համար, ուստի Ադրբեջանը այդ ճակատի մասին էլ պիտի մտածի:
