«Առաջին լրատվական»-ի զրուցակիցն է ԱԺ ԲՀԿ խմբակցության պատգամավոր Մուրադ Գուլոյանը:
– Պարոն Գուլոյան, հրապարակվեց «Ծառուկյան» դաշինքի համամասնական ցուցակը, Դուք ընդգրկված չեք: Ինչո՞ւ, խնդի՞ր է առաջացել:
– Չէ, ինչ խնդիր կարող է լինել, ես ինքս չեմ ցանկանում:
– Ասում են՝ Ձեր որդին առաջիկա խորհրդարանական ընտրություններին կոչ է անում մարզի բնակիչներին քվեարկել ՀՀԿ-ի օգտին, ինչն էլ Ծառուկյանի զայրույթն է շարժել:
– Այդպիսի բան չկա: Ես ինքս եմ հրաժարվել, որևէ ինտրիգ չկա: Դուք գիտեք, որ անկախ կուսակցական պատկանելությունից՝ մենք Ծառուկյան Գագիկի հետ բարեկամներ և մանկության ընկերներ ենք: Դեռ մի բան էլ Ծառուկյան Գագիկի դժգոհությունն է եղել, որ ես չեմ ուզում առաջադրվել: Համենայնդեպս, չեմ ցանկացել:
– Ինչո՞ւ, ի՞նչը Ձեզ դուր չեկավ պատգամավորական աշխատանքում: Ըստ էության՝ Ազգային ժողովը այն աշխատավայրը չէ՞, որտեղ կուզեիք աշխատել:
– Չէ, ոչ թե դա… այլ ընդհանրապես արդեն էն տարիքին ենք, մեծ էլ չենք, բայց, համենայնդեպս, էստաֆետը պետք է տանք ջահելներին, երիտասարդներին:
– Նախընտրական քարոզարշավի ժամանակ մասնակցություն կունենա՞ք:
– Ես ԲՀԿ խորհրդի անդամ եմ, ինչի մասին է խոսքը, իհարկե՝ «Բարգավաճին» եմ աջակցելու:
– Իսկ Ձեր մարզպետ որդի՞ն:
– Իմ որդին… ընդամենը կատարում է մարզպետի պարտականությունը: Ո՛չ ԲՀԿ-ին, ո՛չ էլ ՀՀԿ-ին չի աջակցելու: Ինքը մարզպետ ա:
– Իսկ ԲՀԿ-ի հնարավորություններն այս ընտրություններին ինչպե՞ս եք գնահատում:
– Դեռ ընտրապայքարը չի մեկնարկել, դեռ չեմ կարող որևէ բան ասել…
– Բայց արդեն հայտնի են բոլոր քաղաքական ուժերը և դաշինքները, որոնք մասնակցելու են ընտրություններին, հայտնի են նաև ընտրացուցակները…
– Բացարձակապես չեմ կարող ասել, որովհետև առայժմ քարոզարշավը չի սկսվել, չգիտենք՝ով ինչ ծրագիր ունի և ինչ է ներկայացնելու:
– Իսկ ձգտո՞ւմ եք իշխանափոխության, թե՞ նման խնդիր չի դնում իր առաջ ԲՀԿ-ն:
– Նման խնդիր չենք դնում մեր առաջ, ես ընդամենը ուզում եմ, որ մեր երկիրը լավ լինի, զարգանա, ժողովուրդը լավ ապրի:
– Ըստ Ձեզ՝ ի՞նչն է խանգարել, որ մինչև հիմա ժողովուրդը լավ չի ապրում: ԱԺ պատգամավոր եք, ի՞նչ արեցիք այսքան տարի և ի՞նչ կարող էիք անել, որ չեք արել:
– Բայց ո՞վ ա ասում՝ չի զարգացել, փոփոխություններ կան, իսկ ով ա ասում, որ չի զարգացել:
– Կա պարզ վիճակագրություն, բացի այդ, արտագաղթի տեմպերը չեն թուլացել, ժողովուրդը հուսահատված է, հուսալքված…
– Համենայնդեպս, իմ ընտրատարածքում ես չեմ տեսել արտագաղթ, չգիտեմ, չեմ կարող ասել:
– Ի՞նչ փոփոխություն եք արձանագրել՝ բացի այն, որ երկու տարի առաջ այս օրերին մենք ականատես եղանք, թե ինչպես վարվեցին իշխանությունները Գագիկ Ծառուկյանի հետ:
– Քաղաքականության մեջ ամեն ինչ կարող է լինել, այնպես որ՝ դա էական բան չէ: