«Առաջին լրատվական»-ի զրուցակիցն է գյումրեցի քաղաքագետ Գագիկ Համբարյանը։
-Պարոն Համբարյան, Շիրակի մարզում ՀՀԿ-ն բավականին խայտաբղետ ցանկ է ներկայացրել ռեյտինգային թեկնածուների։ Ի՞նչ եք կարծում, ովքե՞ր են ֆավորիտները։
-ՀՀԿ ցուցակում 13 անձ կա՝ գործող պատգամավորներ, Շիրակի նախկին մարզպետ, հիմնարկ-ձեռնարկությունների տնօրեններ, ինչպես նաև ըստ ՀՀԿ-ի ՝ հանրությանը ծանոթ մարդիկ։ Հիմնական ֆավորիտները 5-ն են՝ նախկին ԲՀԿ-ականներ Մարտուն Գրիգորյանը, Մուշեղ Պետոյանը, ՀՀԿ-ական պատգամավոր Արման Սահակյանը, Ֆելիքս Ցոլակյանը, ՀՀԿ-ն մեծ հույսեր է կապում նաև Սուքիաս Ավետիսյանի հետ։
ՀՀԿ-ի ցուցակում ընդգրկված են նաև Շիրակի մարզպետարանի կրթության բաժնի պետը, «Գազպրոմ Արմենիայի» Շիրակի մասնաճյուղի տնօրենը, Ամասիայի գյուղապետը, մանկապարտեզի վարիչ, անգլերենի ուսուցչուհի, բայց ընտրապայքարը կծավալվի իմ նշած հինգ թեկնածուների միջև և բավականին թեժ պայքար է լինելու։ Հաշվի առնենք այն հանգամանքը, որ բազմաթիվ այլ կուսակցություններ մասնակցություն են ունենալու, առավել ևս Գյումրիում ՀՀԿ-ն շատ ցածր վարկանիշ է ունեցել և հիմա ՀՀԿ-ականներին շատ դժվար է լինելու ժողովրդին համոզել, որ իրենց կուսակցությանը ձայն տան։ Բավականին բուռն պայքար է սպասվում նույն ՀՀԿ-ի մեջ, և պատահական չէ, որ Շիրակի մարզի ՀՀԿ էլիտան ամեն ինչ արեց, որ խաղից դուրս թողնի Գյումրու քաղաքապետ Սամվել Բալասանյանի որդուն։
-Ի՞նչ եք կարծում, Բալասանյանն իր ռեսուրսներն ո՞ւմ օգտին կաշխատացնի։
-Պարոն Բալասանյանը, քաղաքում տարածված լուրերի համաձայն, հայտարարել է, որ հիմնականում պաշտպանելու է Մարտուն Գրիգորյանին, ով իրեն օգնել էր Գյումրու ավագանու ընտրությունների ժամանակ և սատարել էր «Բալասանյան» դաշինքին։ Նաև պետք է նշեմ, որ ըստ քաղաքում տարածված լուրերի՝ Բալասանյանի թիմի մի մասը կսատարի նախկին մարզպետ Ֆելիքս Ցոլակյանին, մի մասն էլ՝ պատգամավոր Սուքիաս Ավետիսյանին։
-Մյուս կուսակցությունների դաշինքների հնարավորություններն ինչպե՞ս եք գնահատում։ Նշվում է, որ այդպես էլ Հայաստանում իշխանություններին ռեալ այլընտրանքային ուժ չստեղծվեց։ Շիրակի մարզը միշտ տարբերվել է ՝առավել բողոքական է եղել։
–Նշեմ, որ բավականին լավ դիրքերում է ԲՀԿ թեկնածու Վարդևան Գրիգորյանը և ՀՎԿ հիմնական թեկնածու Հովհաննես Մարգարյանը։ Հնարավոր է՝ ինտրիգ հաղորդի նաև Գյումրու նախկին քաղաքապետ Վարդան Ղուկասյանը, որը թեև արդեն ակտիվ պայքար է սկսել, բայց պետք է նշեմ, որ նա ռեսուրսների առումով խնդիր ունի՝ լինել քաղաքապետ և օգտագործել ադմինիստրատիվ ռեսուրս, այլ բան է և լինել «սովորական» քաղաքացի ու նախկին պաշտոնյա՝ այլ բան ։
Պետք է նշեմ, որ Արթիկի և Մարալիկի տարածաշրջանում բավականին հետաքրքիր պայքար է սպասվում։Երեք խոշոր ուժեր են մրցակցելու, այստեղ իր դիրքերն ուժեղացրել է ՀՅԴ-ն՝ ի դեմս Վարագյանի, ով նախկինում «Գազպրոմ Արմենիայի» Շիրակի մարզի Արթիկի մասնաճյուղի տնօրենն էր։ Նա քաղաքապետի ընտրություններում չստացավ ՀՀԿ-ի աջակցությունը, չնայած՝ իշխանությունը Մուշեղ Պետոյանի թիկունքում էր, Պետոյանը պարտություն կրեց և այստեղ հետաքրքիր պայքար է սպասվում։ Բավականին մեծ շանսեր ունի այստեղ ՀՎԿ-ի թեկնածուն՝ Արթիկի նախկին ոստիկանապետի եղբայրը։
