Թուրքիայի քեմալական Հանրապետական ժողովրդական կուսակցության պատգամավոր Մահմութ Թանալը հայտարարություն է արել այն մասին, որ երկրի զինված ուժերի գլխավոր շտաբի պետ Հուլուսի Աքարը սերտ կապ ունի ռազմական հեղաշրջման փորձի իրականացման գործում առանցքային դեր ունեցած գեներալ-մայոր Մեհմեթ Դիշլիի հետ: Այս մասին տեղեկացնում է թուրքական «Ջումհուրիյեթ» պարբերականը:
Պատգամավորը հայտնել է, որ Աքարն ու Դիշլին Սաքարյայում համատեղ հողատարածք են գնել, որտեղ նախատեսել են թոշակի անցնելուց հետո հարևանություն անել: Թանալն այս մասին հարցում է արել Հուլուսի Աքարին, սակայն պատասխան չի ստացել:
«Մարդը ո՞ւմ հետ կցանկանա հարևանություն անել` այն անձանց, ում հետ հոգեպես և մտովի համաձայնություն ունի: Եթե նման բան կա, ապա այլ առնչություններ ևս օրակարգ կգան»,- նշել է պատգամավորը:
Հիշեցնենք, որ 2016 թվականի հուլիսի 15-ի երեկոյան զինվորականները Թուրքիայում ռազմական հեղաշրջման փորձ են ձեռնարկել, որը մի քանի ժամ անց ճնշվել է:
Թուրքիայի իշխանությունները կատարվածի կազմակերպիչ են համարում ԱՄՆ Փենսիլվանիա քաղաքում ապաստանած Ֆեթուլլահ Գյուլենին, ով 2014 թվականին «Մեծ կաշառքի» գործով տեղի ունեցած բացահայտումներից հետո դարձել է Էրդողանի թշնամին:
