Հայաստանում այս օրերին տեղի են ունենում ընտրողների զանգվածային տեղաշարժեր: 2017-ի հունվարի 10-ից փետրվարի 10-ը 7000 ընտրելու իրավունք ունեցող քաղաքացի ՀՀ-ում փոխել է հաշվառման վայրը: Այս մասին բարձրաձայնել է ԱԺ պատգամավոր, «Ելք» դաշինքի անդամ Նիկոլ Փաշինյանը: Մամուլում նաև հրապարակումներ կան այն մասին, որ ՀՀԿ-ի ցուցակով Գյումրիում առաջադրված Արման Սահակյանը իր «Սովարնո» ընկերության աշատակիցներին հանում է իրենց հաշվառման հասցեներից և գրանցում Գյումրիում:
Անդրադառնալով այս դիտարկումներին «Առաջին լրատվական»- ի հետ զրույցում «Իրազեկ քաղաքացիների միավորում» ՀԿ համակարգող Դանիել Իոաննիսյանը նշեց. «Ոստիկանությունն իհարկե տիրապետում է այդ տվյալներին. ոստիկանությունը չի կարող մերժել քաղաքացիների դիմումները, բայց կարող է վարվել այլ կերպ, կարող է գործի դնել քրեական հետախուզության միջոցները, որպեսզի պարզի՝ քաղաքացիների նկատմամբ կա՞ պարտադրանք, թե՞ ոչ:
Ոստիկանությունը կորող է գաղտնալսել համապատասխան թեկնածուների շտաբների պետերին, հիմնարկների ղեկավարներին: Եթե «Սովրանո»-ի մասին խոսակցություն կա, ապա տրամաբանական կլիներ, որ ոստիկանությունը օպերատիվ հետախուզական միջոցառումներ կատարեր և պարզեր, թե արդյոք այդ ընկերությունում պարտադրա՞նք է գործում, թե՞ մարդիկ իրենց ցանկությամբ են անում»:
Դանիել Իոաննիսյանի խոսքով՝ բոլոր տեսակի ընտրակեղծարարները, կաշառք բաժանողները գործում են այնպես, որ ԶԼՄ-ները և քաղհասարակությունը իրենց չնկատեն:
Դ. Իոաննիսյանն ընդգծեց, որ ընտրակաշառք վերցնելու համար կարելի է հայտնվել բանտում. «Ոստիկանությունը պետք է ապահովի ՔՕ այս դրույթի կիրարկումը»:
Մանրամասները՝ տեսանյութում: