Ամերիկյան ծովահետևակի վետերանը, ռասիստական կարգախոսներ բացականչելով, կրակ է բացել ամերիկյան բարում հնդիկ ներգաղթյալների խմբի վրա։ Միջադեպի հետևանքով զոհվել է 1, վիրավորվել 2 մարդ։ Այս մասին հայտնում է Times of India-ն։
Դեպքը տեղի է ունեցել Կանզաս նահանգի Օլեյտե քաղաքում։ «Հեռացե՛ք իմ երկրից» բղավելով՝ այցելուն կրակ է բացել հարևանությամբ նստած հնդիկների ուղղությամբ։ Հնդկական Հայդերաբադ քաղաքի 32-ամյա ավիացիոն ինժեներ Շրինիվաս Կուչիբհոտլան տեղում մահացել է։ Եվս 2-ը վնասվածքներով հոսպիտալացվել են։
51-ամյա Ադամ Պուրինթոնն արդեն ձերբակալվել է։
Ականատեսների խոսքով՝ նա հնդիկներին անվանել է Մերձավոր Արևելքից ժամանածներ, հավանաբար, շփոթելով արաբների հետ։
Տարբեր տվյալներով՝ ԱՄՆ-ում մոտ 5 մլն հնդիկ է ապրում։
