Հետաքննությունների դաշնային բյուրոն մերժել է Սպիտակ տան խնդրանքը՝ արգելափակելու ԶԼՄ-ների հաղորդագրություններն ԱՄՆ նախընտրական արշավի ժամանակ ՌԴ նախագահ Վլադիմիր Պուտինի հետ Դոնալդ Թրամփի վարչակազմի կապերի մասին։ Այս մասին հայտնում է CNN-ը՝ հղում անելով իր աղբյուրին։
Նոր վարչակազմի պաշտոնական դիրքորոշումն այն է, որ Թրամփի նախընտրական շտաբը կապ չի ունեցել Կրեմլի հետ։
Հեռուստաալիքի տվյալներով՝ Սպիտակ տունը դիմել է բյուրոյի աշխատակիցներին՝ մի շարք ամերիկյան ԶԼՄ-ների նյութերը որպես ստահոդ որակելու խնդրանքով։
Բյուրոն հրաժարվել է հրապարակավ հանդես գալ հայտարարությամբ, որ նման հաղորդագրությունները կեղծ են, և որ Ռուսաստանի հետ Թրամփի շրջապատի որևէ շփում չի եղել։ Հետաքննությունների դաշնային բյուրոյի տնօրեն Ջեյմս Կոմին հրաժարվել է որևէ բան մեկնաբանել լրագրողներին, քանի որ խոսքն ընթացքի մեջ գտնվող հետաքննության մասին է։
Նշվում է, որ Սպիտակ տան նման դիմումը բյուրոյին, եթե այն իսկապես տեղի է ունեցել, հանդիսանում է ԱՄՆ-ում քաղաքական գործընթացի կանոնադրական խախտում, որտեղ բյուրոյի և վարչակազմի շփումները սահմանափակված են։
Ավելի վաղ Թրամփը մի շարք առաջատար ԶԼՄ-ների անվանել էր ամերիկացի ժողովրդի թշնամի։