«Երկար տարիների ընթացքում մեր բանակում բացառված է եղել քաղաքական ռեսուրսի շահարկումը: Իհարկե, պաշտպանության նախարարի քաղաքական ռեսուրսի շահարկումը, նախարարի կուսակցական լինելը մի կողմից թվում է, թե առավելություն է` մյուս կողմից պետք է հասկանանք, որ այն բոլոր խնդիրները, որ կան բանակում, ու չլուծված հարցերը, դրանք ևս կապում են քաղաքական այն կուսակցության հետ, որը ես ներկայացնում եմ: Ես կարծում եմ, որ նախագահի խոսքերը պետք է շատ ուղիղ հասկանալ` բանակում չի լինելու քաղաքական կուսակցությունների զարգացում, ինչպես և եղել է նախորդ ընտրությունների ընթացքում: Իսկ եթե զինվորները որոշեն, որ պաշտպանության նախարարը լավ է կատարում իր աշխատանքը և որոշեն քվեարկել այն կուսակցությանը, որի նախընտրական ցուցակն եմ ես ղեկավարում, դա իրենց քաղաքացիական իրավունքն է»,- լրագրողների հետ զրույցում այսօր այս մասին ասաց ՀՀ պաշտպանության նախարար Վիգեն Սարգսյանը և հավաստիացրեց. «Բանակը չի ուղղորդվել և չի ուղղորդվի քվեարկության ժամանակ»:
Անդրադառնալով սահմանին տիրող իրավիճակին, նախարարը չժխտեց, որ լարվածության աճ է նկատվում: «Զինադադարի ցանկացած խախտում, լինի մեծ կամ փոքր, որևէ ձևով չի կարող արդարացվել, որովհետև զինադադարի ռեժիմը սահմանված է միջազգային պարտավորություն հանդիսացող հրադադարի մասին համաձայնագրերով»,- ասաց Վիգեն Սարգսյանը և ընդգծեց, որ Պաշտպանության նախարարության, Զինված ուժերի խնդիրն է ապահովել դրանց լիարժեք կատարումը՝ պատասխան գործողություններով, ինչը արվում է:
Անդրադառնալով ապրիլյան պատերազմի ժամանակ վիրավոր զինվորներից մեկի բաց նամակին, թե ինքը անուշադրության է մատնված, անգամ իր ծննդյան օրը չեն շնորհավորել, ապա Վիգեն Սարգսյանն ասաց, որ դա իրենց աշխատանքի բացթողումն է. «Մենք պետք է համբերատար ու պատասխանատու վերաբերվենք նման բոլոր դրսևորումներին: Մարդը, որն ունի առողջական լուրջ խնդիրներ, հատկապես, երբ դրանք ձեռք են բերվել մարտական գործողություններին մասնակցելու ժամանակ, իրավունք ունի անվերապահ պահանջատեր լինելու: Եթե նա սրտնեղում է, մեր աշխատանքի բացթողումն է: Յուրաքանչյուր դեպք մեր ուշադրության կենտրոնում է: Մենք պետք է անենք ավելին»:
Հարցին, թե հնարավո՞ր է, որ մամուլի լուրերը իրականությանը համապատասխանեն և Սեյրան Օհանյանի նկատմամբ քրեական գործ հարուցվի չարաշահումների համար, Վիգեն Սարգսյանը պատասխանեց, որ ցանկացած գործունեության մեջ կան ռիսկեր. «Այնտեղ, որտեղ կան մեծ գործառույթներ, բյուջետային հատկացումներ, կան ավելի մեծ ռիսկեր: Բայց ես չեմ կարծում, թե կարող եմ մեկնաբանել՝ քրեական գործի հիմք կա թե չէ»:
Մանրամասները՝ տեսանյութում: