ՀՀՇ վարչության նախագահ, «Ծառուկյան» դաշինքով առաջադրված Արարատ Զուրաբյանն այսօր՝ փետրվարի 22-ին, լրագրողների հետ հանդիպմանը նշեց, որ համագործակցում են այս ուժի հետ, քանի որ ընդհանուր մոտեցումներ ունեն: «Ոչ վաղ անցյալում լուրջ գործընթաց էր ծավալվել Գագիկ Ծառուկյանի դեմ և այն, որ նա վերադարձավ քաղաքական դաշտ, շատ դրական գնահատեցինք և որոշեցինք համատեղ հանդես գալ,- ասաց Լ. Զուրաբյանը և հաելեց, որ մեծ է հավանականությունը, որ ինքը կլինի Ազգային ժողովում:
Դիտարկմանը, որ ժամանակին իրենք քննադատում էին ՀԱԿ առաջնորդ Լևոն Տեր-Պետրոսյանին Գագիկ Ծառուկյանի և ԲՀԿ-ի հետ համագործակցելու համար, իսկ հիմա իրենք են համագործակցում Ծառուկյանի հետ, Արարատ Զուրաբյանն ասաց. «Մենք քննադատում էինք ոչ թե Գագիկ Ծառուկյանին, այդ Լևոն Տեր-Պետրոսյանի մոտեցումը, մենք համարում էինք, որ բուրժուադեմոկրատական հեղափոխությունն անհեթեթ է: Բացի դրանից, այն ժամանակ ընտրություններ չկային: Այսօր ՀՀ օրենքները թույլ են տալիս քաղաքական ուժերին ձևավորել մեծամասնություն և գալ իշխանության՝ առանց որևէ հեղափոխության: Սա բավականին դրական գործընթաց է»:
Արարատ Զուրաբյանը նշեց, որ Կարապետ Ռուբինյանը, ով քննադատել է Ծառուկյանի հետ ՀՀՇ-ի համագործակցությունը, ՀՀՇ-ից դուրս է եկել մի քանի տարի առաջ, երբ մեկնում էր մշտական բնակության Լիբանան. «Իսկ Ալեքսանդր Արզումանյանը որոշել է դադարեցնել կուսակցական գործունեությունը, այդ որոշումը հարգում եմ»:
Զուրաբյանի հավաստմամբ՝ ՀՀՇ վարչությունը գումարել է նիստ, որին մասնակցել են վարչության 11 անդամներ. «Բացակայել է միայն Ալեքսանդր Արզումանյանը, մնացածը կողմ են արտահայտվել, աջակցել «Ծառուկյան» դաշինքին և առաջադրել իմ թեկնածությունը Կետրոն Էրեբունի – Նորք Մարաշ վարչական շրջաններում»:
«Այսօրվա քաղաքական ներկապնակում քաղաքական դաշինք, որպես այդպիսին, չեմ տեսնում: Նաև չեմ տեսնում, որ առանձին կուսակցություններ վառ ընդգծված գաղափարական պայքար տանեն: Գոնե վերջին տարիներին մենք նման պրոցեսի ականատես չենք եղել»,- նշեց Լ. Զուրաբյանը՝ ընդգծելով, որ քաղաքական գործունեությամբ պետք է մի փոքր պրագմատիկ մոտեցումներով զբաղվել:
Մանրամասները՝ տեսանյութում: