Միջազգային իրավապաշտպան Amnesty International կազմակերպությունը ներկայացրել է ամենամյա հաշվետվություն աշխարհում մարդու իրավունքներին առնչվող իրավիճակի մասին։ Զեկույցի հեղինակները գրանցել են ողջ աշխարհում ագրեսիվ քաղաքականության աճ։ Այս մասին հայտնում է BBC-ն։
2016 թվականին գլոբալ քաղաքականությունում տեղի ունեցած տեղաշարժերը, որոնց Amnesty International-ը դասում է ԱՄՆ նախագահ Դոնալդ Թրամփի ընտրվելը, Brexit-ը և քաղաքականությունը Մերձավոր Արևելքից փախչող ներգաղթյալների հանդեպ, բացասաբար են ազդել մարդու իրավունքների իրավիճակի վրա՝ ասվում է 170 էջանոց զեկույցում։
Խնդրի բնութագրման համար իրավապաշտպանները կիրառել են տերմին, որը նախինում երբեք չի հանդիպել նրանց ամենամյա զեկույցներում՝ «հրեշացման քաղաքականություն»։
Իրավապաշտպանների կարծիքով՝ 2016 թվականին ողջ աշխարհի քաղաքական գործիչները գործածել են «թշնամանքի լեզուն», և դա համադրելի է եղել 1930-ականների ագրեսիվ հռետորաբանության մակարդակի հետ։
Թրամփի նախընտրական հռետորաբանությունն իրավապաշտպաններն անվանել է նողկալի, խտրական, քսենոֆոբիական և կնատյաց։
Թրամփից բացի, «հրեշացման քաղաքականության» ջատագով է կազմակերպությունն անվանել Հունգարիայի վարչապետ Վիկտոր Օրբանին, Թուրքիայի նախագահ Ռեջեփ Թայիփ Էրդողանին և Ֆիլիպինների նախագահ Ռոդրիգո Դուտերտեին։
Մեծ Բրիտանիայի վարչապետ Թերեզա Մեյին իրավապաշտպանները հիշեցրել են հայտարարութունը, որը նա արել էր 2016 թվականի ապրիլին՝ դեռևս ներքին գործերի նախարարի պաշտոնում։ Նա ասել էր, որ Մարդու իրավունքների եվրոպական կոնվենցիան բրիտանացիներին դարձրել է ավելի քիչ պաշտպանված։ Այդ խոսքերը կազմակերպությունն անվանել է 2016 թվականին իրավապաշտպան ինստիտուտների հանդեպ հարգանքի բացակայության բազմաթիվ օրինակներից մեկը։
Ռուսաստանի նախագահ Վլադիմիր Պուտինը զեկույցում նշվում է որպես քաղաքական գործիչ, ով շարունակում է ժողովրդականություն վայելել, սակայն դրա հետ մեկտեղ շարունակում է երկրում կործանել քաղաքացիական հասարակությունը։
«Սիրիական իշխանությունների հետ Ռուսաստանը ոչ ընտրովի հարվածներ է հասցրել և ուղիղ հարձակում գործել Սիրիայում խաղաղ բնակչության և քաղաքացիական օբյեկտների վրա»,-ասվում է զեկույցում։