Անդրադառնալով արևմտահայերենի հիմնախնդիրներին՝ ՀՀ Կրթության և գիտության նախարար Լևոն Մկրտչյանը նշեց. «Մենք այստեղ գործ ունենք ներառական կրթության հետ: Այսօր մենք Հայաստանում ունենք տասնյակ հազարավոր արևմտահայ բնակչություն, որն ունի ոչ միայն իր ուրույն լեզվամտածողությունն, այլ նաև իր աշխարհընկալումը: Երբ մենք խոսում ենք ներառական կրթության մասին, հաճախ հասարակության մոտ տպավորություն է ստեղծվում, որ խոսում ենք հատուկ կարիքներ ունեցող կամ հաշմանդամություն ունեցող երեխաներից: Բայց արևմտահայ, օրինակ սիրիահայ երեխան երբ մտնում է դպրոց՝ 5-6-րդ դասարան, առնչվում է հսկայական խնդիրների հետ, որոնց թվում միայն լեզվական հիմնախնդիրը չէ, և՛ աշխարհընկալման, և՛ միջավայրի, և՛ ապրելաձևի խնդիրներն են:
Մենք իսկապես կարիք ունենք վերանայելու այս հիմնահարցերը՝ ավելի լայն տեսանկյունից, քան մեր լեզվի երկու ուղղություններն են: Նույն հիմնախնդիրը ես տեսել եմ նաև ԱՄՆ-ում, այնտեղ էլ արևելահայ՝ Հայաստանից գնացած երեխաններն են մուտք գործում արևմտահայ կլասիկ դպրոցներ և առնչվում նույն խնդիրների հետ: Ցեղասպանությունից հետո երրորդ-չորրորդ սերունդն է արդեն մեծանում սփյուռքում և նրանց համար հայոց լեզուն, ցավոք, այլևս մայրենի լեզու չէ: Եթե մենք նրանց պարտադրենք հայերենին նայել որպես մայրենի լեզվի, նշանակում է հայերենին տիրապետողների թիվը արհեստականորեն կկրճատենք: Պետք է կարողանանք մշակել ծրագրեր, հայոց լեզուն որպես հիմնական օտար լեզու դասավանդման մեթոդիկա պետք է ունենանք»:
Մանրամասները՝ տեսանյութում:
