Խաղաղության խնդիրների հետազոտման Ստոկհոլմի միջազգային ինստիտուտը (SIPRI) հրապարակել է զենքի համաշխարհային վաճառքի մասին հերթական զեկույցը։ Դրանում նշվում է, որ այդ ոլորտում 2012-16 թթ խոշորագույն արտահանողներ են մնացել ԱՄՆ-ը և Ռուսաստանը։
Խոշոր մատակարարներին (ԱՄՆ, Ռուսաստան, Չինաստան, Ֆրանսիա, Գերմանիա) բաժին է հասել սպառազինությունների վաճառքի ընդհանուր ծավալի 74 տոկոսը, իսկ ԱՄՆ-ին և Ռուսաստանին միասին վերցրած՝ 56 տոկոսը։
Համաձայն փաստաթղթի տվյալների՝ 2004 թվականից աշխարհում վաճառքի ծավալն անշեղորեն աճել է և 2012-2016-ին, 2007-2011 թթ-ի համեմատ, մեծացել 8.4 տոկոսով։ Վերջին հնգամյակը նշանավորվել է սառը պատերազմի ավարտի պահից ի վեր ամենաբարձր ցուցանիշներով։
Զեկույցի հեղինակները նշում են ռազմական մատակարարումների աճ դեպի Ասիա, Օվկիանիա, Մերձավոր Արևելք։
2012-16 թթ Ռուսաստանի մասնաբաժինը սպառազինությունների գլոբալ արտահանման գործում կազմել է 23 տոկոս։ Դրա 70 տոկոսը բաժին է հասել 4 երկրի՝ Հնդկաստանին, Վիետնամին, Չինաստանին և Ալժիրին։ Ռուսաստանը վերջին հնգամյակում, նախորդի համեմատ, արտահանման ծավալը մեծացրել է 4.7 տոկոսով։
Վերջին հնգամյակում ռուսական տեխնիկա են գնել 50 երկրներ։ Ադրբեջանի գնումը ռուսական արտահանման մեջ կազմում է 4 տոկոս։
2012-16 թթ մատակարարների առաջին տեղը նախկինի պես բաժին է ընկել ԱՄՆ-ին, որը նախորդ հնգամյակի համեմատ արտահանումը մեծացրել է 21 տոկոսով։ Ողջ ծավալի գրեթե կեսը ուղակվել է Մերձավոր Արևելք։
