Ադոլֆ Հիտլերի անձնական հեռախոսը ԱՄՆ-ում աճուրդում վաճառվել է 243 հազար դոլարով։ Աճուրդն անցկացրել է Alexander Historical Auctions տունը (Մերիլենդ), կիրակի։ Այս մասին TASS գործակալությանը հայտնել է աճուրդի տան պաշտոնական ներկայացուցիչ Անդրեաս Քորնֆիլդը։
Գնորդի անունը չի հաղորդվում։
Լոտի մեկնարկային գինը կազմել է 200-300 հազար դոլար։ Աճուրդի տանը հույս էին հայտնել, որ սարքը կգնի թանգարաններից մեկը, որպեսզի մարդիկ, նայելով դրան, մտածեին, թե ինչպիսին կարող են լինել ֆաշիզմի հետևանքները։
Հեռախոսը գտնվել է Բեռլինում՝ Հիտլերի բունկերում և կիրառվել կապի համար Երկրորդ համաշխարհային պատերազմի վերջին 2 տարիներին։ 1945 թվականի մայիսին Հիտլերի ինքնասպանությունից հետո խորհրդային զինվորականները սարքը նվիրել էին կապի բրիտանացի սպա Ռալֆ Ռեյներին։ 1977 թվականին նա մահացել է, իսկ հեռախոսը ժառանգությամբ անցել է որդուն՝ Ռեյնուլֆին։
