«Դաշինքները երբեմն տարօրինակ կազմ ունեն, կազմվում են ոչ գաղափարական հողի վրա, մարդը որպես բրենդ է օգտագործվում՝ երբեմն ոչ խելացի ձևով: Բայց մարդը որպես գաղափարների կրող, արտահայտող, իր գաղափարների շուրջ միավորող. նման մոտեցում չեմ տեսնում»,- «Առաջին լրատվական»-ի հետ զրույցում անդրադառնալով նախընտրական փուլում քաղաքական դաշտում տիրող իրավիճակին՝ ասաց հրապարակախոս Արա Նեդոլյանը:
Նրա խոսքով՝ պետք են գաղափարներ, սակայն քաղաքական գործիչների մոտ գերիշխում է «Հիմա դրա ժամանակը չէ» կարգախոսը, որը 25 տարվա ամենաամփոփ կարգախոսներից է, և գաղափարների ժամանակը այդպես էլ երբեք չի գալիս:
Հրապարակախոսի դիտարկմամբ՝ քաղաքականությունը առաջարկ-պահանջարկ հարաբերակցություն է. «Այսօր առաջարկ չկա, բայց պանաջարկի տեսակետից էլ վիճակը վատ է. այսինքն՝ քաղաքացին քաղաքական ուժերից հստակ չի պահանջում ներկայացնել, թե եթե ինքն ընտրվի, ինչ փոփոխություններ են լինելու ոլորտ առ ոլորտ՝ բանակ, կրթություն, տնտեսություն, Արցախ, արտաքին քաղաքականություն և այլն»:
Անդրադառնալով դիտարկմանը, որ պաշտպանության նախկին նախարար Սեյրան Օհանյանը հանդես է գալիս ընդդիմադիր դիրքերից, հայտարարում է, որ դեմ է իշխանությանը և որ այսպես այլևս հնարավոր չէ, Արա Նադոլյանը նշեց, որ դա ծես է. «Եթե գնում է ընտրությունների, դա ծես է, պետք է ասի, որ դեմ է ինչ-որ բաների, բայց ինչպես բազմաթիվ անգամներ արել են Արթուր Բաղդասարյանը կամ ՀՅԴ-ն, ընտրության հաջորդ օրն արդեն կմոռանա, որ դեմ է: Ինչի՞ն է դեմ. կարո՞ղ է այլ բանակ է ուզում Սեյրան Օհանյանը, թող ասի»:
Մանրամասները՝ տեսանյութում: