Ռուսաստանի փոխվարչապետ Դմիտրի Ռոգոզինը հայտարարել է, որ երկրում ստեղծվող նոր միջմայրցամաքային բալիստիկ հրթիռները կարող են հաղթահարել ԱՄՆ ցանկացած պաշտպանություն։ Այս մասին նա հայտարարել է «Ռոսիա 1» հեռուստաալիքի «Վոսկրեսնիյ վեչեռ» ծրագրի ժամանակ։
Փոխվարչապետի խոսքով՝ այդ ոլորտում աշխատանքներն ընթանում են ըստ պլանի։ Նա ընդգծել է, որ նոր զենքը, որը շուտով կհայտնվի բանակի տրամադրության տակ, կարող է հաղթահարել ԱՄՆ-ի «այսօրվա, վաղվա և մյուս օրվա պաշտպանությունը»։
«Մենք կկոտրենք այդ պաշտպանությունը։ Այն մեզ համար չի ներկայացնում լուրջ ռազմական սպառնալիք, սադրանքից բացի»,-ասել է Ռոգոզինը։
2016 թվականի դեկտեմբերին հաղորդվել էր, որ Ռուսաստանի ռազմավարական միջուկային ուժերը 2019-2020 թթ կստանան նոր հրթիռային համալիր, որը կկրի «Սարմատ» անվանումը։ Այն պետք է գա փոխարինելու Ռ-36Մ2 «Վոեվոդ» խորհրդային համալիրներին։