Թուրքիայի արտգործնախարար Մևլյութ Չավուշօղլուն հայտնել է, որ, չնայած Ռուսաստանի հետ հարաբերությունների ջերմացմանը, Մոսկվայի և Անկարայի մոտ տարաձայնություններ են պահպանվում սկզբունքային հարցերով։ Այս մասին նա հայտնել է Մյունխենյան անվտանգության համաժողովի ժամանակ՝ փոխանցում է «Եվրոպեյսկայա պրավդան»։
«Ռուսաստանը մեր առևտրային գործընկերն է, մենք շատ համատեղ նախագծեր ունենք, սակայն դա չի նշանակում, որ մենք ամեն ինչում համաձայն ենք Ռուսաստանի հետ»,-նշել է թուրք արտգործնախարարը։
Նրա խոսքով՝ Թուրքիայի և Ռուսաստանի միջև քաղաքական հարաբերությունները հիմնված են սկզբունքների վրա, և դեռևս մինչ Սու-24-ի հետ կապված միջադեպը՝ խնդիրներ են եղել Մոսկվայի հետ հարաբերություններում՝ կապված Ղրիմի հետ։
«Մենք չենք ընդունել Ղրիմի բռնակցումը։ Մենք տարբեր դիրքորոշումներ ունենք Ասադի ռեժիմի վերաբերյալ, և այդ տարաձայնությունները պահպանվում են»,-պարզաբանել է Չավուշօղլուն։
Միևնույն ժամանակ նախարարը կշտամբել է եվրոպական երկրներին Թուրքիայի և Ռուսաստանի հարաբերությունների հետ կապված անհետևողականություն դրսևորելու համար։
«Միջադեպից հետո ՆԱՏՕ-ի և ԵՄ-ի շատ երկրներ խորհուրդ են տվել մեզ նորմալացնել հարաբերությունները Ռուսաստանի հետ… Մենք նորմալացրել ենք, և դրանից հետո ինձ սկսել են հարցնել, թե ինչի համար ենք մենք դա արել»,-հավելել է նա։
