Թուրքիան հանդես է եկել տեղի անվտանգության ուժերին աջակցելու նպատակով Սիրիայում ԱՄՆ-ի սահմանափակ զորախումբ տեղակայելու առաջարկով։ Այս մասին հայտարարել է Թուրքիայի ԱԳ նախարար Մևլութ Չավուշօղլուն՝ ելույթ ունենալով Մյունխենի անվտանգության հարցերով համաժողովի ժամանակ։
«Երկու օր առաջ Թուրքիա է այցելել ԱՄՆ ԶՈՒ գլխավոր շտաբի պետ, գեներալ Ջոզեֆ Դանֆորդը։ Մենք ամերիկյան կողմին առաջարկել ենք (Սիրիա) ուղարկել հատուկ նշանակության զորախումբ՝ տեղի չափավոր (ընդդիմադիր) ուժերին աջակցելու համար»,- հայտնել է նախարարը՝ փոխանցում է TASS գործակալությունը։
Չավուշօղլուի խոսքով՝ 2016թ. օգոստոսից իրականացվող «Եփրատի վահան» գործողությունը, որն անցկացնում են Թուրքիայի ԶՈՒ-ն և Սիրիայի ազատ բանակը, ապացուցել է իր արդյունավետությունը՝ որպես «ցամաքի վրա սիրիական ուժերին լուրջ աջակցություն ցույց տվող Թուրքիայի հատուկ նշանակության զորքերի հետ տեղական կազմավորումների համագործակցության» հայեցակարգ։ «Շուտով կգրավվի Էլ Բաբը, և դրանից հետո մենք համատեղ կգրոհենք նաև Ռաքքան։ Ռաքքայի վրա կարելի գրոհել կոալիցիայում մեր դաշնակիցների՝ ԱՄՆ-ի հետ։ Մենք նրանց համար բացել ենք մեր Ինջիրլիք ավիաբազան»,- նշել է նա։