«Ընտրություններին մասնակցությունս լինելու է միայն որպես Սիփան Փաշինյանի վստահված անձ, ով ընկերս է և առաջադրվել է: Որպես քաղաքացի՝ առաջիկա ընտրություններին չեմ մասնակցելու, քանի որ որևէ ակնկալիք չունեմ՝ տեսնելով արդեն իսկ տիրող իրավիճակը, տեսնելով թե ինչպիսի դաշինքներ են ձևավորվում քաղաքական դաշտում»,- այս մասին «Առաջին լրատվական»- ի հետ զրույցում ասաց քաղաքացիական ակտիվիստ Մաքսիմ Սարգսյանը՝ հավելելով, որ քաղաքացիական պայքարի օջախներ դեռ չի տեսնում և որ ինչ-որ բան անելը՝ ազդելու մարդկանց կարծիքի վրա, անիմաստ է, քանի որ պատկերը մնալու է նույնը:
«Կողմնորոշվողներն արդեն կողմնորոշվել են: Ի՞նչ անել փողոցում, եթե մարդկանց մեծ մասը վաճառել է իր ձայնը կամ որոշել է վաճառել: Այնքան են ընտրության մեխանիզմը Հայաստանում խեղել, որ չես հասկանում՝ որ տարբերակն է ճիշտ, բոյկոտե՞լ, թե՞ գնալ ընտրության, որ չկարողանան կեղծել՝ քո փոխարեն ընտրելով: Ես չունեմ նախընտրած թեկնածու, իմ ձայնին տեր կանգնելով՝ կգնամ, անվավեր կդարձնեմ քվեաթերթիկս, որպեսզի դա այլ նպատակով չօգտագործվի»,- նշեց Մ. Սարգսյանը:
Քաղաքացիական ակտիվիստը նշեց, որ այնուամենայնիվ հույս ունի, որ գործընթացներն այնպես կզարգանան, որ պատրաստ կլինի աջակցել դաշինքներից մեկին՝ «Ելք»- ին, որի նկատմամբ որոշակի վստահություն ունի. «Մյուս դաշինքերի կամ անձանց նկատմամբ վստահությունս զրո տոկոս է՝ պայմանավորված նրանց ծավալած գործունեությամբ, նրանց քայլերով. կատարել են քայլեր, որոնք, որպես քաղաքացի, ինձ համար, անհասկանալի են եղել»:
Մանրամասները՝ տեսանյութում: