ԱՄՆ Կոնգրեսի հանրապետական սենատորները կողմ են Իրանի դեմ լրացուցիչ պատժամիջոցներ սահմանելուն: Reuters-ի հաղորդմամբ՝ այս մասին հանրապետական Լինդսի Գրեմը հայտնել է Մյունխենի անվտանգության հարցերով կոնֆերանսի ժամանակ:
Հանրապետական սենատորները Իրանին մեղադրում են ՄԱԿ ԱԽ բանաձևերը խախտելու, բալիստիկ հրթիռների փորձարկման և Մերձավոր Արևելքում իրավիճակի «ապակայունացման» համար: «Կարծում եմ՝ ժամանակն է, որ Կոնգրեսը լրջորեն վերաբերվի Իրանին՝ նկատի ունենալով ամենը, ինչ նա արել է միջուկային ծրագրի սահմաններից դուրս»,- ասել է Գրեմը: Նա նաև նշել է, որ մյուս հանրապետականները ևս ուզում են միջոցներ ներդնել՝ Իրանին ստիպելու համար պատասխանատվություն կրել իր գործողությունների համար:
Հունվարի վերջին Fox News հեռուստաալիքը, հղում անելով Պենտագոնի ներկայացուցչին, հայտնեց, որ Իրանը միջին հեռահարության հրթիռ է փորձարկել: Դրանից հետո ԱՄՆ նախագահ Դոնալդ Թրամփը հայտարարեց, որ «Իրանը կրակի հետ է խաղում», իսկ ԱՄՆ ֆինանսների նախարարությունն ընդլայնեց հակաիրանական պատժամիջոցները:
Ի պատասխան՝ իրանցի պաշտոնատար անձինք հայտարարեցին, որ Իրանը լիակատար իրավունք ունի իր պաշտպանական ծրագրերն իրականացնելու և հրթիռային փորձարկումները չեն հակասում ո՛չ Գործողությունների համատեղ բազմակողմանի ծրագրին (Իրանի միջուկային ծրագրի հարցով համաձայնագիր), ոչ՛ ՄԱԿ ԱԽ 2231 բանաձևին: