Օրերս փաստաբանների պալատը նոր խորհուրդ ընտրեց: 12 անդամից կազմված խորհրդի կազմում ընդգրկվելու համար իրենց թեկնածությունն էին առաջադրել 39 փաստաբան: Փաստաբանների մի մասը դժգոհում է փաստաբանների պալատի խորհրդի ընտրություններից՝ նշելով, որ կեղծիքներով ու խախտումներով է ընթացել: Փաստաբաններ Արթուր Գրիգորյանը և Տիգրան Աթանեսյանն այս կապակցությամբ հանդես են եկել հայտարարությամբ:
«Առաջին լրատվական»- ի հետ զրույցում փաստաբան Արթուր Գրիգորյանը ներկայացրեց իր հիմնավորումներն այն մասին, որ արդար և թափանցիկ չեն անցկացվել ընտրությունները: Նրա հավաստմամբ՝ խորհրդի կազմում ընդգրկված 12 անդամներից առնվազն 8-ը պալատի տարբեր մարմիններում զբաղեցնում են պաշտոններ, և դա ինքնին ճնշում էր, որպեսզի քվերակությունը ուղղորդված լինի. «Մենք դիմել ենք դատարան՝ վիճարկելու ենք ընտրությունների արդյունքները, ի թիվս այլ հանգամանքների, հիմքում դնելու ենք նաև այն, որ մյուս թեկնածուները այդ բլոկի թեկնածուների համեմատ եղել են անհավասար պայմաններում»:
Փաստաբանի խոսքով՝ պալատում կա ակնհայտ բաժանում՝ յուրայինների և օտարների: 2013թ-ից սկսած Փաստաբանների պալատում տեղի է ունեցել իշխանության ուզուրպացիա:
«Պալատը մաքրազերծվել է այն անձանցից, ովքեր որ կարող էին Արա Զոհրաբյանին հանկարծ հակաճառել: Այլախոհությունն այստեղ անթաքույց կերպով հետապնդվում է… Իմ և Տիգրան Աթանեսյանի միակ մտահոգությունն այն է, որ փաստաբանությունը, որը ժողովրդավարական հասարակության կարևորագույն օղակներից մեկն է, չդառնա հերթական միակուսակցական օղակ, բայց այսօր Փաստաբանների պալատում միապետություն է»,- նշեց Ա. Գևորգյանը:
Մանրամասները՝ տեսանյութում:
