«Ընդհանրապես քաղաքացիական հասարակությունը ամեն անգամ սպասում է, թե ինչ վարք կդրսևորեն քաղաքական խաղացողները: Այս անգամ քաղաքական վարքը բավական տարօրինակ է, որովհետև կուսակցությունների, դաշինքների կազմավորման մեթոդաբանությունն անհասկանալի է, այդ ամբողջ լղոզվածությունը համատարած շփոթի տպավորություն է թողնում»,- այս մասին «Առաջին լրատվական»-ի հետ զրույցում ասաց հրապարակախոս Զարուհի Հովհաննիսյանը՝ անդրադառնալով հարցին, թե ինչու է նախընտրական այս փուլում քաղաքացիական հասարակությունը պասիվ:
Նա նշեց, որ քաղաքացիական հասարակության մի քանի ներկայացուցիչներով որոշել են բովանդակություն հաղորդել քաղաքական գործընթացին՝ հանրության կյանքում առկա կարևորագույն խնդիրների բարձրաձայնմամբ և այդ հարցադրումները քաղաքական ուժերին ուղարկելով: Նրա խոսքով՝ հարցադրումները կվերաբերեն կոռուպցիայի դեմ պայքարին, կուսակցությունների արտաքին կողմնորոշմանը, Ղարաբաղյան հարցի վերաբերյալ դիրքորոշմանը և այլն:
Հրապարակախոսի խոսքով՝ համատարած պոպուլիստական աղմուկ է ստեղծվել. «Նախկին իշխանության կրողները հայտնվել են ընդդիմադիր շարքերում, որևէ բացահատում չանելով իրենց համամասնակցությամբ կատարված հանցագործոթյունների վերաբերյալ՝ փորձում են պոպուլիստական ճառերի միջոցով ձայներ գրավել: Նրանք այժմ էլ մեծ հարստության տեր են, բայց նրանցից ոչ մեկը չի պատասխանել սոցիալական արդարության և անհավասարության խնդրին վերաբերող որևէ հարցի»:
Զարուհի Հովհաննիսյանի կարծիքով՝ համամասնական կոչված ընտրությունը այնքան էլ համամասնական չէ, ռեյտինգային ցուցակներում կարող է ներգրավվել ամբողջ օլիգարխիան և անցնել խորհրդարան. «Նրանց հայտնվելը այդ ցուցակներում վկայում է այն մասին, որ կոռուպցիայի դեմ պայքարը Հայաստանում ձախողվել է: Վտանգ կա, որ ԱԺ-ն կարող է ուենանալ ավելի վատ որակ»:
Անդրադառնալով վարչական ռեսուրս չկիրառելու վերաբերյալ վարչապետի զգուշացմանը, որ դա դիտվելու է որպես արջի ծառայություն, հրապարակախոսը նշեց, որ այդպիսի պոպուլիստական հայտարարություներ բացմիցս հնչել են, սակայն վարչական ռեսուրսի չարաշահումը ՀՀԿ-ի կենսակերպի մի մասն է կազմում:
«Մենք միշտ եղել ենք արձանագրողի դերում, այժմ փորձելու ենք քաղաքացու մեջ առաջացնել այն միտքը, որ ինքը ոչ միայն արձանագրող է, այլ նաև գործընթացներ առաջացնող է և պահանջատեր»,- նշեց հրապարակախոսը:
Լուսանկարը` PAN Photo-ի
