Փետրվարի 16-ին Մյունխենում ԵԱՀԿ Մինսկի խմբի համանախագահների և Հայաստանի ու Ադրբեջանի նախարարների միջև տեղի ունեացավ Լեռնային Ղարաբաղի հարցով հանդիպում: «Առաջին լրատվական»- ի հետ զրույցում քաղաքագետ Սերգեյ Մինասյանը, անդրադառնալով հարցին, թե ինչ արդյունքներ կարելի է սպասել այդ հանդիպումից, և վերլուծելով Մինսկի խմբի տարածած հայտարարությունը՝ նշեց. «Ամենագլխավոր արդյունքն այն էր, որ նախարարների մակարդակով հանդիպումը, որը կազմակերպվել էր համանախագահների կողմից, միգուցե որոշ չափով ձևական, բայց բանակցային գործընթացի շարունակությունն է:
Համոզված եմ, որ այդ բանակցությունների ժամանակ գլխավոր խնդիրը, որը այս կամ այն ձևով քննարկվում էր, վստահության մեխանիզմների ստեղծման անհրաժեշտության խնդիրն էր: Եվ համանախագահների հայտարարության մեջ խոսքը Վիեննայում և Սանկտ Պետերբուրգում ձեռք բերված պայմանավորվածությունների արդյունքների մասին է, որոնց հիման վրա որոշակի գործողություններ պետք է իրականացվեն, որոնք պետք է նպաստեն վստահության մեխանիզմների ավելացմանը և դրա հետ մեկտեղ որոշ չափով հնարավորություն ստեղծեն՝ բացառելու միջադեպերը շփման գծում: Բացի դրանից՝ այնտեղ կար հղում, որը, կարծում եմ, կարելի է կապել Ալիևի վերջին հայտարարության հետ, որտեղ ասել էր, թե Ղարաբաղում ռազմական գործողությունների վերսկսման հարցը Ադրբեջանի ներքին գործն է:
Բացի դրանից՝ մենք նաև տեսանք փետրվարի 20-ին նշանակված Լեռնային Ղարաբաղում սահմանադրական հանրաքվեի վերաբերյալ որոշ դրույթներ, որտեղ նշվում է՝ այո՛, մենք նշում ենք և հասկանում ենք, որ դե ֆակտո ԼՂՀ և՛ իշխանությունները, և՛ ժողովուրդը պետք է ունենան ընտրական պրոցեդուրաներ, բայց դա չի անդրադառնալու ԼՂՀ-ի վերջնական, իրավական կարգավիճակի վրա: Հասկանալի է, որ հանրաքվեն և ընտրություններն իրավական առումով չեն որոշում Արցախի կարգավիճակը, բայց կնպաստեն այդ գործընթացին… Կարծում եմ՝ Մինսկի խմբի նպատակը բանակցային գործընթացը շարունակելն է»:
Մանրամասները՝ տեսանյութում: