Միգրացիոն ռեժիմի խստացման մասին ԱՄՆ նախագահ Դոնալդ Թրամփի կողմից ստորագրված հրամանագիրը, որը ժամանակավոր արգելք է սահմանել 7 պետությունների, այդ թվում Իրանի քաղաքացիների ԱՄՆ մուտքի վրա, վիրավորանք է դարձել ողջ իրանցի ժողովրդի համար։ Այս մասին CNN –ի հետ հարցազրույցում ասել է Իրանի արտգործնախարար Մուհամմադ Ջավադ Զարիֆը։
Զարիֆի խոսքով՝ անհնար է գտնել մի իրանցու, ով գոնե մեկ ահաբեկչական գործողություն իրականացրած կլինի ամերիկացիների դեմ։ «Իրանը մշտապես հանդես է եկել ԱՄՆ-ում կատարված յուրաքանչյուր ահաբեկչության դատապարտմամբ՝ սկսած 2001 թվականի սեպտեմբերի 11-ից»,-ասել է Զարիֆը՝ զրուցելով հեռուստաալիքի թղթակցի հետ անվտանգության հարցերով Մյունխենի համաժողովի շրջանակում։
Մեկնաբանելով Վաշինգտոնի կողմից Իրանի դեմ պատժամիջոցների ընդլայնումը, որի մասին հայտարարվել էր փետրվարի 3-ին, Զարիֆն ասել է, որ Իրանի դեմ սահմանափակող միջոցառումների ներմուծումը չի աշխատում։ «Մենք այդքան էլ լավ չենք արձագանքում սպառնալիքներին, մենք լավ ենք արձագանքում փոխադարձ հարգանքին և փոխադարձ շահերին»։ Ինչպես դրա հետ կապված նշել է Զարիֆը՝ ԱՄՆ նախկին նախագահ Բարաք Օբաման արդյունքում համաձայնել է իրանական միջուկային ծրագրի հարցով Թեհրանի հետ նստել բանակցային սեղանի շուրջ, քանի որ հասկացել է, որ «պատժամիջոցները չեն աշխատում»։