Պաշտպանության նախարար, ՀՀԿ նախընտրական համամասնական ցուցակի առաջին համար Վիգեն Սարգսյանը նախօրեին մեկնել է Գերմանիա՝ Մյունխեն, որտեղ կմասնակցի անվտանգության թեմայով միջազգային ամենամյա համաժողովին: Գերմանիա նրա այցը ըստ էության հանդիսանալու է Վիգեն Սարգսյանի միջազգային բեմելը և ավելի շուտ ոչ իբրև պաշտպանության նախարար, այլ իբրև ներիշխանական նոր դասավորությունում Սերժ Սարգսյանի նախընտրելի ֆիգուր: Թե հատկապես ինչ ծրագրեր ունի Սերժ Սարգսյանը Վիգեն Սարգսյանի հետ այդ կապակցությամբ, դեռևս պարզ չէ:
Այսինքն՝ Վիգեն Սարգսյանը կլինի՞ Սերժ Սարգսյանին փոխարինող, թե՞ կլինի Կարեն Կարապետյանին հակակշիռ, մինչև Սերժ Սարգսյանը կլուծի նախագահի պաշտոնից հետո վարչապետի պաշտոնին հայտնվելու հարցը, դեռևս դժվար է ասել: Սակայն ՀՀԿ համամասնական ցուցակը գլխավորելուց հետո այդ կարգավիճակով Մյունխենի անվտանգության համաժողովին մասնակցությունը, անկասկած, Վիգեն Սարգսյանի «շնորհանդեսը» կլինի արդեն որպես իշխանության մեջ կարևոր բևեռ կամ թև, որի վրա պատրաստվում է հենվել Սերժ Սարգսյանը կամ որին պարզապես փոխանցել իշխանությունը:
Ընդ որում հետաքրքրական է, որ Մյունխենի համաժողովին մասնակցում է նաև արտգործնախարար Էդվարդ Նալբանդյանը և այս տեսանկյունից առավել ևս ակնհայտ է դառնում, որ Վիգեն Սարգսյանի գերմանական գործուղումով Սերժ Սարգսյանը ուղարկում է հատուկ մեսիջ, այսինքն՝ մեսիջ, որը չէր կարող կամ չէր ցանկանա փոխանցել Էդվարդ Նալբանդյանի միջոցով:
Ըստ որում, մեկ այլ հետաքրքրական հանգամանք է հենց Գերմանիայի պարագան և այստեղ Մյունխենի համաժողովը Վիգեն Սարգսյանի միջազգային բեմելը կազմակերպելու տեսանկյունից ոչ միայն ինքնին առիթ է, այլ առիթ նաև Գերմանիա մեկնելու առումով: Գերմանիան Եվրամիության և ներկայումս միջազգային քաղաքականության առաջատարներից է, հատկապես նկատի ունենալով ԱՄՆ-ում Թրամփի իշխանության գալու և այդ իմաստով ամերիկյան քաղաքականության մեջ որոշակի տրանսֆորմացիաների անցումային փուլը, երբ հստակ չէ, թե ի վերջո ինչ կայուն գծի մեջ է հայտնվելու ԱՄՆ քաղաքականությունը: Այս տեսանկյունից Գերմանիայի դերն առավել աճում է:
Եվ ի լրումն այս ամենի, թերևս ավելորդ չի լինի հիշատակել, թե ուր մեկնեց Սերժ Սարգսյանն իր և Հայաստանի համար բավական ծանր և վճռորոշ օրերին, Ապրիլյան պատերազմի հրադադարից անմիջապես հետո: Սերժ Սարգսյանը չմեկնեց Մոսկվա, այսպես ասած Հայաստանի միակ դաշնակից երկրի մայրաքաղաք, այլ մեկնեց Գերմանիա, որտեղ արեց նաև հայտարարությունը «հզոր բարեկամներ» կամ այլ կերպ ասած դաշնակից չունենալու մասին, Մոսկվայի պահվածքին ուղղված ակնհայտ ակնարկով:
Լուսանկարը՝ armeniasputnik.am-ի