«Ընտրողները «Ելք» դաշինքին ձայն պետք է տան, քանի որ այն ստատուս քվոն փոխելու ուժ է: Ստատուս քվոն այն իրավիճակն է, որ այսօր ունենք՝ 25 տարի կուտակված խնդիրներ, կոռուպցիա, մայրաքաղաքի և մարզերի անհամաչափ զարգացում, իրավունքի գերակայության բացակայություն: Մենք գալիս ենք փոխելու ստատուս քվոն: Բազմաթիվ մարդկանց մատից փուշ ենք հանել, հարյուրավոր քաղաքացիներ կոնկրետ ինձ դիմել են, և մասնագիտական կարողություններիս սահմանում օգնել եմ նրանց: Ես և Նիկոլ Փաշինյանը արել ենք ամենը մեր մեկական մանդատը լիարժեք իրացնելու համար: Այժմ «Ելքի» յուրաքանչյուր պատգամավոր աշխատելու է մեզ նման, և ստատուս քվոն փոխվելու է»,- «Ելք» դաշինքի առաջնորդների հետ այսօր կայացած հանրային հանդիպման ժամանակ ասաց «Լուսավոր Հայաստան» կուսակցության նախագահ Էդմոն Մարուքյանը:
Նա նաև հավելեց, որ դաշինքի նախընտրական ծրագրում կներկայացվի տնտեսության վերաբերյալ իրենց տեսլականը. «Երբ պետությունը համապատասխան պայմաններ ապահովի, տնտեսությունն անկասկած կզարգանա: Տարիներով մեզ խաբել են, որ վատ ենք ապրում հայ-թուրքական փակ սահմանի պատճառով, մինչդեռ իրականությունն այն է, որ վատ ապրել ենք կոռուպցիայի, տնտեսության մեջ անհավասար մրցակցության, դատական իշխանության անկատարության հետևանքով: Մենք գալիս ենք՝ ապահովելու տնտեսության զարգացման համար բոլոր նախապայմանները»:
Մանրամասները՝ տեսանյութում: