ՀՀ մշակույթի նախարար Արմեն Ամիրյանը «Հանրապետական» կուսակցության նախընտրական ցուցակում 5-րդ տեղը զբաղեցնելը հաճելի և պարտավորեցնող է համարում: Կառավարության նիստից հետո լրագրողների հետ զրույցում նա ասաց, որ քարոզչությունն իրականացնելու է օրենքով սահմանված կարգով և նախընտրական շրջանում արձակուրդ կգնա օրենսդրությամբ սահմանված կարգով:
Նրա խոսքով՝ կուսակցության որոշումն է՝ ընդգրկել նախարարներին ցուցակում և կարծում է՝ ճիշտ որոշում է։ Իսկ իր ներկայացվածությունը ցուցակում, գտնում է, որ դրական կազդի ձայներ հավաքելու համար: Արմեն Ամիրյանն ասաց, որ իր համար հաճելի նորություն է քաղաքականությամբ զբաղվելը և Հայաստանի Հանրապետական կուսակցության համար հաճույքով է աշխատելու:
Իր հետագա գործունեության և պաշտոնը պահպանելուվերաբերյալ, Արմեն Ամիրյանը նշեց, որ մեծամասնությունը պետք է ձևավորի կառավարություն, և եթե Հանրապետականը լինի մեծամասնություն և ձևավորի կառավարություն, անշուշտ իրենց տրվելու է հնարավորություն վարչապետ Կարեն Կարապետյանի թիմով շարունակելու արդեն սկսված ծրագրերը:
Պատասխանելով հարցին, թե ինչպե՞ս պետք է համոզի քաղաքացիներին, որ ընտրեն ՀՀԿ-ին, նախարարը նշեց. «Նոր ծրագրերով, նոր գաղափարներով և այն վստահությամբ, որը փորձում ենք մեր աշխատանքով սերմանել»:
Անդրադառնալով ձևավորվող դաշինքներին` Արմեն Ամիրյանը նշեց, որ «բոլորն էլ արժանի մրցակիցներ են»:
Ինչ վերաբերում է պաշտպանության նախկին նախարար Սեյրան Օհանյանի հայտարարություններին, որ Հայաստանում կան քաղբանտարկյալներ, ըստ Արմեն Ամիրյանի, դրանք հաճոյանալու նպատակ ունեն. «Նախընտրական շրջան է` հաճոյանալու համար ամեն բան կարող են ասել», – ասաց նախարարը:
Նա ընդգծեց, որ նախընտրական շրջանը չի ազդի մշակույթի ոլորտում ներդրումների կատարմանը, քանի որ հիմնական ներդրողները մասնավոր են: Նախարարն հավաստիացրեց, որ արդեն ունեն 17 ներդրումային ծրագրեր, որոնց մեծ մասն արդեն մեկնարկել է և առաջիկա մեկ-երկու ամիսների ընթացքում իրականություն կդառնա:
«Սակայն այդ 17 ծրագրերի վրա յուրաքանչյուր ամիս, յուրաքանչյուր օր ավելանում են նոր ծրագրեր, նոր գաղափարներ»,-ասաց նա և նշեց, որ մասնավորապես որոշման նախագիծ կա, որ Հաղպատում կառուցեն Սայաթ-Նովայի թանգարան:
Մանրամասները՝ տեսանյութում:
