ՀՀԿ նախընտրական համամասնական ցուցակում Երևանի քաղաքապետ Տարոն Մարգարյանի երկրորդ համարը հուշում է, որ Երևանի քաղաքապետի ընտրությանը ՀՀԿ-ի համար նրա թեկնածության հարցը այլևս փակ է, և Տարոն Մարգարյանը լինելու է քաղաքապետի ՀՀԿ թեկնածուն:
Երևանի քաղաքապետի ընտրությունը տեղի կունենա խորհրդարանի ընտրությունից մոտ մեկ ամիս անց՝ մայիսին: Թեև իր բնույթով ՏԻՄ այդ ընտրությունն ավելի մոտ է համապետական մասշտաբին՝ հաշվի առնելով այն, որ Երևանում է կենտրոնացած հանրապետության թե՛ ժողովրդագրական, թե՛ տնտեսական ռեսուրսի կեսը, իսկ տնտեսական մասով՝ գուցե կեսից ավելին: Այս հանգամանքը Երևանի քաղաքապետի պաշտոնը դարձնում է իսկապես լուրջ և ծանրակշիռ քաղաքական պաշտոն, ըստ էության՝ բևեռ:
Մյուս կողմից, սակայն, Տարոն Մարգարյանի պարագայում առկա է մեկ այլ ուշագրավ հանգամանք: Բանն այն է, որ եթե Երևանի քաղաքապետի մասով Տարոն Մարգարյանի համապետական երկրորդ համարը հուշում է, որ նա երաշխավորել է քաղաքապետի թեկնածությունը, այնուհանդերձ՝ համապետական մասշտաբի առումով նրա դեմ դրվել է բավականին լուրջ մեկ այլ թեկնածություն՝ ԴԱՀԿ նախկին պետ, Սերժ Սարգսյանի ֆավորիտ Միհրան Պողոսյանի թեկնածությունը:
Միհրան Պողոսյանը ռեյտինգային ընտրակարգով պատգամավորի թեկնածու է առաջադրվել այն ընտրատարածքում, որը ներառում է նաև Ավանը: Իսկ Ավանը, այսպես ասած, Տարոն Մարգարյանի քաղաքական կշռի հիմքն է: Այնտեղ Մարգարյանը ներկայացված է լինելու իր աներորդով՝ ներկայումս պատգամավոր Ռոբերտ Սարգսյանով:
Փաստորեն, մեծ է հավանականությունը, որ Տարոն Մարգարյանը պարտություն կկրի այնտեղ, որտեղ նրա հաղթանակը եղել է երաշխավորված: Բացառված չէ, որ երաշխավորված քաղաքապետությունը նա ստացել է հենց այն բանի դիմաց, որ կորցրել է երաշխիքները Ավանում: Իսկ դա նշանակում է, որ Երևանի քաղաքապետի պաշտոնը պահելով՝ Տարոն Մարգարյանը ոչ թե պահում կամ ավելացնում է իր կշիռը ներիշխանական համակարգում, այլ հակառակը՝ սկսում է կորցնել և այդ կորստի, այսպես ասած՝ նվազման գնով է պահում Երևանի քաղաքապետի պաշտոնը: Ի վերջո, պատգամավորական ընտրությունը թեև ընդամենը Երևանի մի ընտրատարածքն է, այնուհանդերձ՝ դրա էությունը համապետական ներիշխանական գործընթաց է, որտեղ ուժերի հարաբերակցությունն ի վերջո հանդիսանում է ավելի դոմինանտ:
Այսինքն՝ առաջին հայացքից դիրքերի պահպանումը իրականում կարող է ունենալ լիովին այլ տրամաբանություն, և Ավանից Մարգարյանի սկսած կարիերայի աճը հենց Ավանից էլ ըստ էության կարող է սկսել անկումը կամ ավարտը: Պարզապես, Սերժ Սարգսյանն առայժմ որևէ փոփոխության չի գնում Երևանի քաղաքապետարանի մակարդակում, քանի դեռ չի ամբողջացրել վերադասավորումը համապետական մասշտաբով:
Թեև, իհարկե, դեռևս բաց է հարցը, թե արդյո՞ք Սերժ Սարգսյանը երաշխիքներ տվել է Միհրան Պողոսյանին, թե՞ ընդամենը նրան տվել է Տարոն Մարգարյանի հետ մրցելու հնարավորություն: