Մոսկվայի հիվանդանոցներից մեկում կյանքի համար կռիվ է տալիս Վլադիմիր Պուտինի հայտնի քննադատ Կարա-Մուրզան։ Մտերիմները կարծում են, որ նրան թունավորել են, և մեղադրում են Կրեմլին իշխանության բոլոր քննադատների համար թշնամական միջավայր ստեղծելու մեջ։
«Պուտինն անձամբ և նրա կառավարությունը ինչ-որ կերպ պատասխանատու են սրա համար։ Նրանք պատասխանատու են այն բանի համար, որ ստեղծել են երկրում այդպիսի մթնոլորտ, երբ մարդկանց սպանում են իրենց համոզմունքների համար»,-ասել է Վլադիմիր Կարա-Մուրզայի կինը՝ Եվգենյան, Expressen-ի հետ հարցազրույցում։
Երբ Վլադիմիր Կարա-Մուրզա-կրտսերը հինգշաբթի հիվանդանոց ընկավ, նա կյանքի ու մահվան շեմին էր։ Հարազատները պատմել են, որ օրգանիզմը դադարել էր գործել, և նա ընկել էր կոմայի մեջ։ Այժմ նա արդեն արթնացել է, և վիճակը կայունացել է, սակայն ընդդիմադիր քաղաքական գործչի և լրագրողի վիճակը, ով դեռևս ի վիճակի չէ խոսել, դեռևս շատ լուրջ է։
Մտերիմների մոտ դեժավյուի զգացում է։ Երկու տարում երկրորդ անգամ Վլադիմիր Կարա-Մուրզան հիվանդանում է առեղծվածային հիվանդությամբ։ Անցած անգամ նա անձամբ էր վստահություն հայտնել, որ իրեն թունավորել են հատուկծառայությունները։ Այս անգամ նրա կինը նույնպես տեսնում է միայն մեկ բացատրություն՝ թույնը։
«Բժիշկներն ասում են, որ դա անհայտ նյութի ազդեցության արդյունք է, այսինքն՝ պարզ մարդկային լեզվով ասած՝թունավորում է»,-ասել է նա։
Բժիշկները մամուլին հայտնել են, որ, ըստ երևույթին, թույնի մասին խոսք չի գնում։
Անցած անգամ կասկածներ կային, որ ամեն ինչում մեղավոր են դեղորայքի կողմնակի էֆեկտները, սակայն Կարա-Մուրզայի մտերիմների խոսքով՝ նա այդ դեղերն այլևս չի ընդունում։
Եվգենյան համոզված է նրանում, որ ինչ-որ մեկը ցանկանում է թունավորել իր ամուսնուն նրա քաղաքական աշխատանքի համար։ Նա, օրինակ, փորձել է համոզել ԱՄՆ-ին, որ Ռուսաստանի դեմ պատժամիջոցները պետք է խստացնել, իսկ մյուս երկրներին կոչ է արել միանալ դրանց։
«Իրավիճակը Ռուսաստանում հիմա այնպիսին է, որ ընդդիմության ներկայացուցիչներին սպանում են, հետապնդում, բանտ նստեցնում. լիարժեք անպատժելիության նման իրավիճակում կարող է պատահել ինչ ասես»,-ասել է Եվգենյան։
Երկու տարի առաջ Կրեմլի պատերի մոտ գնդակահարվել է Բորիս Նեմցովը՝ ընդդիմության առաջնորդն ու Կարա-Մուրզայի ընկերը։ Նեմցովի մտերիմները քննադատել են քննությանն այն բանի համար, որ սպանության կազմակերպիչն այդպես էլ պատասխանատվության չի ենթարկվել։
«Նախագահ Պուտինը մարդասպան է, և նրա հետ պետք է հենց այդպես էլ վերաբերվել։ Չի կարելի նորմալ հարաբերություններ կառուցել ինչ-որ մեկի հետ, ով նման կերպ է վարվում իր քաղաքացիների հետ»,- ասել է Եվգենյա Կարա-Մուրզան։
Կարա-Մուրզայի առեղծվածային հիվանդության վերջին նոպան գրավել է ԱՄՆ-ի ուշադրությունը։ Քաղաքական գործիչ Ջոն Մաքքեյնը խոսել է հնարավոր թունավորման մասին։
«Միանգամայն անհեթեթ է այդ դժբախտ դեպքը նախագահ Պուտինի հետ կապելը»,-ասել է ՌԴ նախագահի պաշտոնական ներկայացուցիչ Դմիտրի Պեսկովը։
Հաշվի առնելով ընտանեկան կարգավիճակը՝ հեշտությամբ կարելի է մտածել, որ Եվգենյա Կարա-Մուրզան կնախընտրեր, որպեսզի ամուսինը հրաժարվեր իր քաղաքական գործունեությունից, որի հետ, ինչպես ինքն է կարծում, կապված է ամուսնու հիվանդությունը։
Սակայն Կարա-Մուրզան ամեն անգամ Ռուսաստան է վերադառնում ԱՄՆ-ից, որտեղ նա ժամանակ առ ժամանակ բնակվում է։ Եվ կինն ասում է, որ երբեք չի ստիպի ամուսնուն թողնել գործը։
