Microsoft-ի մասնագետները նոր գործառույթ են ներդրել Cortana վիրտուալ օգնականի համար: Այն արդեն կարող է հիշեցնել էլեկտրոնային փոստի հաղորդագրություններում տված խոստումները, հայտնում է gogetnews.info-ն:
Այս գործառույթը հիմնված է մեքենայական ուսուցման տեխնոլոգիաների վրա: Այն վերլուծում է օգտատիրոջ էլեկտրոնային նամակագրությունը և գտնում է արտահայտությունները, որոնք կարող են խոստումներ և պարտավորություններ արտահայտել: Օրինակ ՝ օգտատերը կարող է նամակում գրել. «Ես զեկույցը վաղը կուղարկեմ»: Հետո նա Cortana-ից ծանուցում կստանա, որում կպարունակվի զեկույցն ուղարկելու նշված խոստումը: Հիշեցումը կարելի է հետաձգել կամ առաջադրանքը նշել որպես կատարված:
Նոր գործառույթն առայժմ հասանելի է միայն Windows 10 օպերացիոն համակարգի համար ԱՄՆ-ում: Առաջիկա շաբաթներին այն կներդրվի Android-ի և iOS-ի համար հավելվածներում: Խոստումները հիշեցնող գործառույթն աշխատում է Outlook.com և Office 365 ծառայությունների հետ համատեղ: Այլ փոստային ծառայությունների, օրինակ՝ Gmail-ի աջակցությունը հետագայում կավելացվի:
