ԱՄՆ-ը Վրաստանում կկառուցի զինվորական նախապատրաստության կենտրոն՝ նման գերմանական Հոհենֆել քաղաքի ամերիկյան բազային, որտեղ նախապատրաստություն են անցնում զինվորները ՆԱՏՕ-ի առաքելության կազմում Աֆղանստան ուղևորվելուց առաջ։ Այս մասին հայտնում է «Գռուզիա-Օնլայնը»՝ հղում անելով Վրաստանի Պն հաղորդագրությանը, որը տարածվել է նախարար Լևան Իզորիայի և գլխավոր շտաբի պետ Վլադիմիր Չաչիբայայի Գերմանիա այցի արդյունքներով, որտեղ նրանք հանդիպել են Եվրոպայում ԱՄՆ ցամաքային զորքերի հրամանատար, գեներալ-լեյտենանտ Ֆրեդերիլ Բեն Հոջեսի և ԱՄՆ եվրոպական ուժերի ուսումնամարզական հրամանատարության ղեկավար, բրիգադի գեներալ Անտոնիա Աուգուստոյի հետ։
Առաջիկայում գեներալ Աուգուստոն կայցելի Թբիլիսի՝ տեղում քննարկելու շինարարության մանրամասները։
Անցած տարվա վերջին Վաշինգտոնն ու Թբիլիսին համաձայնեցրել էին վրացի զինվորականների նախապատրաստման նոր ամերիկյան ծրագիր՝ նախատեսված 3 տարվա համար։ Դրա շրջանակում էլ կկառուցվի այդ կենտրոնը։
«Դրանք հավակնոտ պլաններ են, որոնք մենք մտադիր ենք իրագործել այս տարի։ Մեր ռազմավարական գործընկերների հետ մենք կկառուցենք մարտական պատրաստության կենտրոն»,-հայտարարել է Իզորիան։
Վրաստանի պաշտպանության նախարարը նման պլաններն անվանել է «պատմական»։