Փետրվարի 12-ին ֆուտբոլի Հայաստանի ազգային հավաքականը Թուրքիայի Անթալիա քաղաքում պետք է ընկերական հանդիպում անցկացներ Ուզբեկստանի ընտրանու հետ: Հայաստանի ազգային հավաքականի գլխավոր մարզիչ Արթուր Պետրոսյանը մրցակից էր ընտրել Ուզբեկստանին, քանզի հենց այս հավաքականը խաղաոճով նման է աշխարհի առաջնության ընտրական փուլում մերոնց հետո միևնույն ենթախմբում ընդգրկված Ղազախստանին: Վերջինի հետ Հայաստանը մրցելու է մարտի 26-ին՝ Երևանում, և Ուզբեկստանի հետ հանդիպումը միակ հնարավորությունն էր Պետրոսյանի համար փորձարկումներ անելու, ինչպես նաև ֆուտբոլիստների հնարավորությունները ստուգելու համար: Պետրոսյանը հայտարարել էր, որ այս մրցավեճում խաղալու հնարավորություն է տալու միայն հայկական ակումբներում հանդես եկող խաղացողներին:
Հունվարի 20-ին Հայաստանի ֆուտբոլի ֆեդերացիան հանդես եկավ հայտարարությամբ՝ նշելով, որ վերջին շրջանում Թուրքիայի տարածքում հաճախակի բնույթ են կրում ահաբեկչական գործողությունները, և անվտանգության նկատառումներից ելնելով՝ որոշում է կայացվել հրաժարվել Ուզբեկստանի հավաքականի հետ ընկերական հանդիպումից: Հունվարի վերջին հայտնի դարձավ, որ Ուզբեկստանի հետ Հայաստանի ազգային հավաքականի փոխարեն մրցելու է «Ալաշկետրը», որը ուսումնամարզական հավաք է անցկացնում Թուրքիայում: Այսօր Թուրքիայի Բելեկ քաղաք ուսումնամարզական հավաքի է մեկնել նաև Գյումրիի «Շիրակը»:
«Ալաշկերտ»-Ուզբեկստան հանդիպմանը, ի դեպ, ներկա է գտնվելու նաև Արթուր Պետրոսյանը: Նա Թուրքիայում կդիտի ֆուտբոլի Հայաստանի չեմպիոնի մասնակցությամբ ևս երկու խաղեր:
Այսօր «Ալաշկերտը» կմրցի ղազախական «Իրտիշի», իսկ փետրվարի 12-ին՝ «Ակժայիկի» հետ: Նշենք, որ «Շիրակը» և «Ալաշկերտը» Հայաստանի ուժեղագույն ակումբների շարքում են դասվում, և փաստորեն տեղական թիմերի ֆուտբոլիստների կտրվածքով այսօր Հայաստանի ազգային հավաքականի մոտ կեսը գլխավոր մարզչի հետ միասին գտնվում է Թուրքիայում:
Եթե ՀՖՖ-ն այդքան մտահոգ է ազգային թիմի ֆուտբոլիստների ճակատագրով, ինչպես ստացվե՞ց, որ Հայաստանի ազգային հավաքականի զգալի մասն, այդուհանդերձ, հայտնվեց հարևան երկրում: Բնականաբար, ՀՖՖ-ն չէր կարող արգելել ֆուտբոլիստներին այցելել Թուրքիա: Այդ դեպքում հայտարարության մեջ կարելի էր գոնե հորդորել հայկական թիմերին և մարզիչներին չմեկնել վտանգավոր գոտի:
Ստեղծված իրավիճակը խոսում է այն մասին, որ Թուրքիա այցելելը վտանգավոր էր կամ անցանկալի ոչ թե ֆուտբոլիստների կամ մարզիչների, այլ Ֆուտբոլի ֆեդերացիայի կամ ինչ-որ անձանց համար: Աբսուրդային մի վիճակ, որի հետևանքով տապալվեց ազգային թիմի մակարդակով մրցավեճը Ղազախստանի հետ կարևոր խաղից առաջ:
Նման կառույցները որևէ հայտարարություն կատարելու դեպքում պետք է հիմնավոր փաստեր ներկայացնեն, որոնք ընկալելի կլինեն ֆուտբոլասերներին: Երբ բանակցություն էր ընթանում Ուզբեկստանի ֆուտբոլի ֆեդերացիայի հետ ընկերական հանդիպման կայացման վայրի վերաբերյալ, հայկական կողմի համար Թուրքիան վտանգավոր երկիր չէ՞ր:
Կարծում ենք՝ տեղի ունեցածից հետո Ուզբեկստանը երբևէ Հայաստանի հավաքականի հետ ընկերական հանդիպում չի անցկացնի: Երկրպագուների գերակշռող մասն այն կարծիքին է, որ ՀՖՖ-ն ինչ-ինչ պատճառներով չցանկացավ, որ հավաքականը խաղա Ուզբեկստանի հետ մրցավեճը, այն չեղյալ համարելու համար ահաբեկչական գործողությունների վտանգը հիմք ընդունեց:
Հ.Գ. Այսօր ՖԻՖԱ-ն հրապարակել է ազգային հավաքականների նոր վարկանիշային աղյուսակը, որում Հայաստանի ազգային հավաքականը առաջադիմելով 4 հորիզոնականով՝ հանգրվանել է 82-րդ տեղում: Ղազախստանի ընտրանին ևս առաջադիմել է 2 հորիզոնականով և 96-րդն է, իսկ Ուզբեկստանը երկու կետով նահանջելով՝ տեղ է զբաղեցրել 63-րդ հորիզոնականում: Ադրբեջանի հավաքականը 89-րդն է, Իրանը՝ 32-րդը, իսկ Թուրքիան՝ 24-րդը: Առաջին հորիզոնականում շարունակում է մնալ աշխարհի փոխչեմպիոն Արգենտինան, որին հաջորդում են Գերմանիան, Չիլին, Բելգիան, Ֆրանսիան, Կոլումբիան, Պորտուգալիան, Ուրուգվայը և Իսպանիան: Ռուսաստանի հավաքականը նահանջել է ևս 5 հորիզոնականով և գտնվում է միայն 61-րդ տեղում: