Բելառուսի ԱԳՆ-ն արձագանքել է ՀՀԿ խմբակցության քարտուղար Վահրամ Բաղդասարյանի հայտարարությանն այն մասին, որ պետք է բարձրացնել ՀԱՊԿ-ում Բելառուսի անդամակցության դադարեցման հարցը՝ բլոգեր Ալեքսանդր Լապշինի արտահանձնման կապակցությամբ:
«ՀԱՊԿ-ում Բելառուսի անդամակցության դադարեցման հարցը բարձրացնելու առաջարկը զուրկ է իրավական հիմքերից»,-մեջբերում է Interfax գործակալությունը Բելառուսի ԱԳՆ մամուլի քարատուղար Դմիտրի Միրոնչիկի հայտարարությունը:
Նա նաև նշել է, որ ՀԱՊԿ-ին անդամակցելը կամ չանդամակցելը կամովին է, իսկ Բելառուսն արդեն «կատարել է իր ընտրությունը»:
«Սա առաջին դեպքը չէ, երբ Բելառուսը ոչ միանշանակ դիրքորոշմամբ է հանդես գալիս։ Սա պարզապես փոքրիկ գործարք է։ Շքանշանի փոխարեն` Լապշինի հանձնում։ Սա ՀԱՊԿ-ի անդամի կողմից մարդու իրավունքների ոտնահարում է։ Մենք պետք է բարձրացնենք ՀԱՊԿ-ում Բելառուսի անդամակցության դադարեցման հարցը»,-ասել է Վահրամ Բաղդասարյանը:
Հիշեցնենք, որ Բելառուսի Գերագույն դատարանը փետրվարի 7-ին մերժել է Ռուսաստանի և Իսրայելի քաղաքացի, բլոգեր Ալեքսանդր Լապշինի բողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվի Ադրբեջան: Լապշինը նույն օրը հատուկ չվերթով տեղափոխվել է Մինսկից Բաքու ` պետական անվտանգության ծառայության աշխատակիցների ուղեկցությամբ: Ադրբեջանում ՌԴ և Իսրայելի քաղաքացի բլոգերին սպառնում է քրեական հետապնդում 281.2 (երկրի դեմ ուղղված հրապարակային կոչեր) և 318 (Ադրբեջանի Հանրապետության պետական սահմանի անօրինական հատում) հոդվածներով: Երկու հոդվածներով Լապշինին սպառնում է մինչև 5 տարվա ազատազրկում: