Վրաստանի նախկին վարչապետ Բիձինա Իվանիշվիլիի դեմ կոմպրոմատ հանդիսացող աուդիոձայնագրությունները պահվում են Երևանում: Ինչպես հաղորդում է «Գրուզիա Օնլայն»-ը, այս մասին հայտարարել է Ռուսթավի 2 հեռուստաալիքի տնօրեն Նիկա Գվարամիան:
Նրա խոսքով՝ այդ աուդիոձայնագրությունների մասին իրեն պատմել է Վրաստանի գլխավոր դատախազի նախկին տեղակալ Լաշա Նացվիլաշվիլին, որն առաջարկել է ձեռք բերել դրանք մի քանի միլիոն դոլարով: Բայց գործարքը չի կայացել, քանի որ Գվարմիան բավարար գումար չի ունեցել:
Նիկա Գվարամիան պատրաստակամություն է հայտնել նաև դատարանում վկայություն տալ այս գործի վերաբերյալ և մանրամասն պատմել, թե ինչպես է Իվանիշվիլիի դեմ կոմպրոմատը հայտնվել Երևանում: «Նա մինչ օրս այդ նյութերը պահում է Երևանում: Ամեն դեպքում նա ինձ ասել է, որ նյութերը պահվում են Երևանում՝ իր ընկերոջ մոտ»,-ասել է նա և հավելել, որ լսել է աուդիոձայնագրություններից մեկը:
Լաշա Նացվիլաշվիլին իր հերթին հերքել է իր դեմ ուղղված մեղադրանքները՝ նշելով, որ հեռուստաալիքի տնօրենի խոսքերը իրականության հետ ոչ մի կապ չունեն:
