Ղրղըզստանի ապրանքաշրջանառությունը Եվրասիական տնտեսական միության անդամ երկրների հետ նախորդ տարում նվազել է 16․7%-ով և կազմել է 1․743 միլիարդ դոլար։ Ինչպես հաղորդում է TASS գործակալությունը, այս մասին հայտարարել է Ղրղըզստանի փոխվարչապետ Օլեգ Պանկրատովը։
Նրա խոսքով՝ արտահանման ցուցանիշները նվազել են 8.1%-ով, իսկ ներմուծումը՝ 18.5%-ով։ Պանկրատովի կարծիքով այս ցուցանիշները վկայում են երկրի տնտեսությունում դրական միտումների մասին, քանի որ հանրապետությունն աստիճանաբար կրճատում է արտասահմանյան արտադրանքի ներմուծումը և ավելի շատ վաճառքներ է իրականացնում արտաքին շուկաներում։ Նա նաև նշել է, որ առևտրի կրճատումը կապված է տարածաշրջանային ճգնաժամի հետ, ինչն իր հերթին առաջացել է էներգակիրների համաշխարհային գների նվազման, մի շարք երկրների կողմից Ռուսաստանի հանդեպ պատժամիջոցների սահմանման պատճառով։
Ղրղըզստանը ԵՏՄ անդամ է դարձել 2015թ․ օգոստոսին։